Sud u Techasie daŭ hihanckija terminy za napad na imihracyjny centr. Kiraŭnik hrupy atrymaŭ 100 hadoŭ turmy
Abvinavačanyja atrymali ad 30 da 100 hadoŭ pazbaŭleńnia voli za ataku na fiederalny imihracyjny centr u Techasie. Uzbrojenyja levaradykały adkryli ahoń pa supracoŭnikach palicyi i paranili adnaho ź ich, piša Bi-bi-si.
Sud prysiažnych pryznaŭ vinavatymi dzieviać abvinavačanych u sakaviku. U aŭtorak, 23 červienia, sud vyznačyŭ terminy pakarańnia dla vaśmi padsudnych. Vyniasieńnie prysudu jašče adnoj fihurantcy spravy zapłanavana na lipień.
Samy vialiki termin atrymaŭ Biendžamin Sonh, jakoha śledstva ličyła lidaram hrupy. Jaho prysudzili da 100 hadoŭ pazbaŭleńnia voli. Jašče šeść čałaviek atrymali ad 50 da 70 hadoŭ. Adzin z padsudnych, pryznany vinavatym u mienš ciažkich złačynstvach i jaki navat nie prysutničaŭ padčas akcyi, atrymaŭ 30 hadoŭ turmy.
Incydent adbyŭsia 4 lipienia 2025 hoda kala centra ŭtrymańnia «Prejrylend» u Alvarada (štat Techas) — ustanovy, dzie pad kantrolem Imihracyjnaj i mytnaj palicyi ZŠA (ICE) utrymlivajucca imihranty.
Kala dziasiatka čałaviek u čornym adzieńni prybyli da centra paśla nastupleńnia ciemry. Jak adznačaje prakuratura, niekatoryja pačali razmaloŭvać ścieny i słužbovy aŭtamabil, inšyja paškodzili kamieru videanazirańnia. Taksama jany zapuskali fiejervierki.
Lidar hrupy, Biendžamin Sonh, były marski piechaciniec, znachodziŭsia na niekatoraj adlehłaści, uzbrojeny vintoŭkaj. Kali na tryvožny vyklik prybyŭ palicejski, Sonh streliŭ u jaho. Palicejski atrymaŭ ranieńnie, napadniki raźbiehlisia.
Paźniej aktyvistaŭ zatrymali i abvinavacili ŭ terarystyčnaj dziejnaści.
Jak piša Reuters, advakaty zajavili, što padsudnyja płanavali mirnuju akcyju pratestu ŭ padtrymku ludziej, jakija ŭtrymlivajucca ŭ imihracyjnym centry, i admaŭlali suviaź hrupy z «Antyfa», decentralizavanym antyfašysckim rucham, jaki prezident Donald Tramp u minułym hodzie abviaściŭ «unutranaj terarystyčnaj arhanizacyjaj».
Advakat Sonha Filip Chejs zajaviŭ, što jaho padabaronny maje namier padać apielacyju. Pavodle jaho słoŭ, asudžanyja — heta nie «kučka terarystaŭ», a hrupa maładych ludziej, «jakija chacieli, kab ich hołas byŭ pačuty». U svaju čarhu, paśla vyniasieńnia prysudu vykonvajučy abaviazki hienieralnaha prakurora Tod Błanš napisaŭ u sacsietkach, što vitaje rašeńnie suda, dadaŭšy, što «ekstremisckamu hvałtu niama miesca ŭ našaj krainie».
Ciapier čytajuć
Upieršyniu za čas nazirańniaŭ tempieratura pavietra ŭ Biełarusi pierakročyła +40°C3
Kamientary
My pačuli vaši hałasy.