Prapahandysty miarkujuć, što biełarusy pavinny zachoŭvać źbieražeńni tolki ŭ nacyjanalnaj valucie.
«Časam navat stanovicca škada rodnaha «zajčyka». Špyniajuć jaho, niebaraku, usie kamu chočacca, uznaharodžvajuć kryŭdnymi epitetami. I sprabujuć pazbavicca ź luboj nahody», — tak pačynajecca artykuł u haziecie «Respublika» Uładzimira Vałčkova pra nieabchodnaść dedalaryzacyi ekanomiki.
«Adkul ža ŭziacca stabilnaści abmiennaha kursu, kali bolšaść addaje pieravahu apieravańniu čužoj valutaj?!
Prynamsi, mienavita jaje vykarystoŭvać u jakaści srodku depazitaŭ. U tym liku i karotkaterminovych. Znoŭ ža havorka idzie nie tolki pra piensijanieraŭ, jakija vykrojvajuć sa svaich ścipłych dachodaŭ dvaccatačku na čorny dzień.
Sapraŭdy hetak ža pastupajuć pradprymalniki, bankiry, pramysłoŭcy. I nie tolki pryvatniki, ale i dziaržaŭnyja pradpryjemstvy i struktury.
A jak ža niekali našumiełaja prahrama pa dedalaryzacyi ekanomiki? Niešta pra jaje ničoha nie čuvać z 2009 hoda.
Mabyć, adzinym i pryncypovym administracyjnym rašeńniem dla jaje vykanańnia źjaviłasia zabarona na valutnaje kredytavańnie fizičnych asob», - adznačajuć prapahandysty.
Ale čamuści dalej hetaha kroku pa źniaćci ad «zialonaj zaležnaści» nie pajšli, piša hazieta.
«Zrazumiełaja sprava, rašeńni niepapularnyja. Ale i bieź ich, miarkujučy pa ŭsim, nie abyścisia. Inakš dziejnaść Nacbanka zvodzicca da virtuoznaha žanhlavańnia manietarnymi instrumientaryjami, kab nie abvalić kurs i nie puścić inflacyju hałopam.
Jak byccam inšych prablem u finansavaj sistemie niama. Ale na ich nie chapaje ni sił, ni resursaŭ. Siońnia ŭ abarocie, pa statystycy Nacyjanalnaha banka, znachodzicca kala Br14 trłn., plus bolš za Br 60 trłn. u jurydyčnych i fizičnych asob zachoŭvajecca na pieravodnych i inšych depazitach. Hetyja hrošy adrazu mohuć vylicca na valutny rynak - bolš za $8 młrd. Da taho ž treba mieć zapas tryvałaści pa zabieśpiačeńni źniešniehandlovych ździełak.
Pa finansavaj kłasicy ličycca, što «zanačka» pavinna składać ekvivalent 3-miesiačnaha abjomu impartu. U biełaruskim vypadku - kala $11 młrd. Atrymlivajecca, što kala traciny VUP treba trymać na ŭsialaki vypadak u zapasie. Ci nie zašmat?! A na madernizacyju ekanomiki adkul srodki ŭziać?!
U apošni čas davodzicca čuć šmat sientencyj pra davier nasielnictva da biełaruskaha rubla. Maŭlaŭ, brakuje jamu ŭstojlivaha imidžu. Ci narodu - patryjatyzmu. Dźvie substancyi ŭzajemaźviazanyja. I źjavicca niadkul i prosta tak nie mohuć. Dla taho i isnuje dziaržava, kab pravilna rasstaŭlać akcenty. U tym liku i administracyjna-zakanadaŭča», - piša hazieta.
U kancy artykuła prapahandysty prapanujuć zabaranić valutnyja depazity.
«Pakul ajčynny rubiel, pa sutnaści, pazbaŭleny žorstkaj abarony. De-jure jon źjaŭlajecca adzinaj paŭnapraŭnaj hrašovaj adzinkaj u Biełarusi. Prynamsi, praktyčna ŭsie raźliki i fizičnych, i jurydyčnych asob unutry krainy vyrablajucca mienavita ŭ biełaruskich rublach. De-fakta funkcyju nazapašvańnia, a ŭ vialikaj stupieni i vymiareńnia vartaści zachapiŭ dalar. Ci nie para abmiežavać pretenzii «zamiežnika»?
Heta suśvietnaja valuta, ź joj pracujuć bolšaść hłabalnych rynkaŭ, voś i niachaj «zialony źmij» vykarystoŭvajecca tolki dla źniešnich apieracyj. A rabić źbieražeńni łahična ŭ nacyjanalnych hrašovych adzinkach.
Ničoha strašnaha nie adbudziecca. I ŭkładčyki nikudy nie ŭciakuć. Kali banki trochi pavarušacca. Jašče hadoŭ piać tamu cikaviŭsia ŭ maścitych finansistaŭ: ci dazvalaje zakanadaŭstva pryviazvać dachodnaść układaŭ da abmiennaha kursu? Usie adkazali: dazvalaje. I tut ža pačali rabić ahavorki: maŭlaŭ, kab vyvieści taki pradukt, treba ŭsio paličyć, ukłaści srodki ŭ jaho raspracoŭku...
Adnym słovam, navošta tuzacca, pakul isnujuć valutnyja rachunki. Mahčyma, para prajavić volu i ad ich sychodzić?» - reziumuje hazieta.
Kamientary