U Biełarusi ŭvodzicca achoŭnaje pradpisańnie dla achviar hvałtu ŭ siamji
Achoŭnaje pradpisańnie dla achviar hvałtu ŭ siamji ŭvodzić zakon «Ab asnovach dziejnaści pa prafiłaktycy pravaparušeńniaŭ», jaki nabyvaje moc 16 krasavika, paviedamiŭ načalnik upraŭleńnia prafiłaktyki Ministerstva ŭnutranych spraŭ Aleh Karaziej na pres-kanfierencyi ŭ Minsku 14 krasavika.
Pavodle jaho słoŭ, achoŭnaje pradpisańnie budzie prymianiacca da čałavieka, jaki ŭčyniŭ pravaparušeńnie ŭ śfiery siamiejnych adnosinaŭ paŭtorna na praciahu hoda.
U vypadku kali achviara hvałtu pakidaje ahulnaje žyllo, hvałtaŭniku stavicca ŭ abaviazak nie iści ź joju na kantakt. Zabaroniena rabić sproby vyśviatlać miesca znachodžańnia achviary, naviedvać miescy jaje znachodžańnia, razmaŭlać z paciarpiełymi ad hvałtu ŭ siamji, u tym liku pa telefonie, z vykarystańniem interneta.
U vypadku kali achviara hvałtu zastaniecca ŭ ahulnym žylli, pravaparušalniku stavicca ŭ abaviazak pakinuć jaho i nie šukać z achviaraj nijakich kantaktaŭ. Hvałtaŭnik taksama pazbaŭlajecca prava rasparadžacca ahulnaj z achviaraj ułasnaściu.
Achoŭnyja pradpisańni vynosiacca na praciahu troch dzion i mohuć dziejničać ad troch da 30 sutak. Kali achviara na niejkim etapie vyrašyć daravać vinavatamu ŭ hvałcie, pradpisańnie budzie źniataje.
Karaziej adznačyŭ, što zakon pradpisvaje miascovym vykanaŭčym orhanam stvarać kryzisnyja pakoi jak dla achviar hvałtu, tak i zabiaśpiečvać miescami časovaha znachodžańnia hramadzian, u dačynieńni da jakich vyniesiena achoŭnaje pradpisańnie ŭ adpaviednaści z paradkam, ustanoŭlenym Savietam ministraŭ. Hety paradak, skazaŭ pradstaŭnik MUS, jašče nie vyznačany, chacia prajekt pastanovy «padrychtavany MUS i ŭzhodnieny z usimi zacikaŭlenymi bakami».
U suviazi z hetym načalnik upraŭleńnia pa nahladzie za vykanańniem zakanadaŭstva i zakonnaściu pravavych aktaŭ Hienieralnaj prakuratury Pavieł Radzivonaŭ adznačyŭ, što dla taho, kab zakon dziejničaŭ, nieabchodna stvarać peŭnyja ŭmovy. «Naprykład, čałavieku vyniesiena zabarona naviedvać ułasny dom na praciahu dvuch tydniaŭ. U takim vypadku pavinny być praduhledžanyja miescy časovaha znachodžańnia, jakija pavinny być stvoranyja, kab zakon pracavaŭ. Tolki tady možna budzie ŭnosić achoŭnyja pradpisańni», — skazaŭ jon.
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary