80 hod tamu była zasnavanaja partyja Biełaruskaja chryścijanskaja demakratyja. U honar hetaj padziei ŭ Miensku prajšła navukova‑praktyčnaja kanferencyja «BCHD: historyja i perspektyva».
Kanferencyju «Biełaruskaja chryścijanskaja demakratyja: historyja i perspektyva» zładziŭ arhkamitet BCHD na čale z Paŭłam Sieviaryncam. Mierapryjemstva, u jakim uziali ŭdzieł śviatary roznych kanfesijaŭ, viadomyja palityki, hramadzkija aktyvisty i dziejačy kultury, pačałosia z supolnaha vykanańnia himnu «Mahutny Boža» i malitvy.
Pačynajučy sustreču, Pavał Sieviaryniec nahadaŭ, što siońnia pavinien byŭ adbycca sud nad adnym ź siabroŭ arhkamitetu Źmitrom Daškievičam. Pa jaho słovach, ułady niezdarma vybrali akurat hety dzień — 6 listapada. I, pavodle palityka, rašeńnie pravodzić taki kanferencyju siońnia było słušnym, pra što śviedčyć pieranos pracesu pa spravie Daškieviča na 9 listapada.
Kolki dzion tamu ŭ Minjust byli padadzienyja dakumenty na rehistracyju HA «Biełaruskaja chryścijanskaja demakratyja», a taksama rychtujucca dakumenty dla rehistracyi partyi. Adnak Pavał Sieviaryniec nia maje iluzijaŭ nakont mahčymaści rehistracyi. Dokazam hetamu jon nazyvaŭ niesupynny pieraśled siabroŭ niezarehistravanaj jašče arhanizacyi.
Sp. Sieviaryniec paviedamiŭ taksama pra mahčymaje stvareńnie chryścijanska‑demakratyčnaha cieniavoha ŭradu: «My bačym svajo paklikańnie ŭ tym, kab uvieści chryścijanskija pryncypy ŭva ŭsiu biełaruskuju palityku i hramadzkuju dziejnaść». Pastar Ernest Sabiła, jaki vystupiŭ z dakładam «Zmahańnie biełaruskich chryścijanaŭ za relihijnuju, sacyjalnuju i nacyjanalnuju spraviadlivaść u pavajenny čas», pieraściaroh — pierš čym iści ŭ palityku, treba prymirycca z Boham.
Staršynia Partyi BNF Vincuk Viačorka nazvaŭ hałoŭnym vyklikam siońniašniaha dnia levy papulizm, jaki najbolš vyrazna vyjaŭlajecca ŭ palitycy i idealohii Čavesa dy Łukašenki. Sp. Viačorka źviarnuŭ uvahu na tuju kalasalnuju padtrymku, jakuju akazvaje venesuelski dyktatar svaim «kaleham» pa ŭsim śviecie. Viartajučysia ŭłasna da biełaruskaj palityki, jon adznačyŭ važnaść jednaści biełaruskich demakrataŭ: «U siońniašniaj biełaruskaj palitycy, u tym liku ŭ demakratyčnaj palitycy, na žal, jość usiakaje. Jość kuluary i pijary, intryhi i haniebnaja zaležnaść ad nie zaŭsiody sumlennych hrantadaŭcaŭ(…)U hetym sensie tyja ludzi, jakija, niahledziačy na lubyja spakusy, za ideju, za ideał, pavinny być razam».
U časie kanferencyi prahučali dakłady Anatola Hryckieviča, jaki asabista z pryčyny chvaroby nie prysutničaŭ, Uładzimiera Konana. Pracavali palityčnaja, histaryčnaja i sacyjalnaja sekcyi kanferencyi. Zaviaršyŭ mierapryjemstva bard Andrej Mielnikaŭ.
Kamientary