Z čornaha śpisa ES vyklučany vosiem proźviščaŭ ź Biełarusi
Rada Jeŭrasajuza vyklučyła vosiem proźviščaŭ sa śpisa pradstaŭnikoŭ Biełarusi, u dačynieńni da jakich dziejničajuć sankcyi, paviedamlaje pres-słužba Rada ES.
Tak, z čornaha śpisa vyklučany:
- były prakuror Minskaj vobłaści Alaksandr Archipaŭ;
- sudździa suda Frunzienskaha rajona horada Minska Hanna Samaluk;
- staršynia Mahiloŭskaj rehijanalnaj vybarčaj kamisii Valeryj Bierastaŭ;
- člen CVK Natalla Bušnaja;
- prakuror Andrej Mihun;
- były namieśnik staršyni KDB Mikałaj Svarob;
- namieśnik staršyni KDB Piotr Traćciak;
- były načalnik upraŭleńnia ŭradavaj suviazi KDB Ihar Varapajeŭ.
Razam z tym u śpis dabaŭleny sudździa škłoŭskaha rajonnaha suda Vital Vołkaŭ.
U studzieni 2012 hoda pryniaŭ rašeńnie ab pieravodzie eks-kandydata ŭ prezidenty Biełarusi Mikałaja Statkieviča ŭ turmu zakrytaha typu ŭ Mahilovie na padstavie taho, što Statkievič nibyta parušaŭ praviły źniavoleńnia ŭ papraŭčaj kałonii № 17 Škłova. «Heta rašeńnie pryviało da parušeńnia pravoŭ Statkieviča, u tym liku da pazbaŭleńnia snu i pahrozy zdaroŭju», — havorycca ŭ aficyjnym paviedamleńni.
«U śviatle surjoznaj zaniepakojenaści ŭ śfiery pravoŭ čałavieka, adzin čałaviek dadadzieny ŭ śpis sankcyj, — havorycca ŭ paviedamleńni. — Razam z tym rada miarkuje, što bolš niama padstaŭ dla znachodžańnia ŭ hetym śpisie vaśmi čałaviek».
Nahadajem, Jeŭrasajuz adnaviŭ dziejańnie sankcyj u dačynieńni da Biełarusi paśla žorstkaha razhonu demanstracyi 19 śniežnia 2010 hoda.
29 kastryčnika 2013 hoda dziejańnie sankcyj praciahnuli na hod - da 31 kastryčnika 2014 hoda. «Heta adbyłosia ŭ suviazi z tym, što palityčnyja viaźni da hetaha času nie vyzvalenyja, a palapšeńniaŭ u śfiery pavahi pravoŭ čałavieka, viaršenstva zakona i demakratyčnych pryncypaŭ u Biełarusi nie nazirajecca», - havaryłasia tady ŭ paviedamleńni pres-słužby ES.
Paśla pierahladu sankcyj u śpisie asob, jakim zabaronieny ŭjezd na terytoryju ES i čyje finansavyja srodki ŭ ES pavinny być zamarožanyja, 232 proźviščy.
Akramia taho, sankcyi praciahvajuć dziejničać u dačynieńni da 25 biełaruskich pradpryjemstvaŭ.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam10
Kamientary