Tolki praz paŭhoda znajšoŭ sabie pracu były hałkipier barysaŭskaha BATE Andrej Harbunoŭ. Najlepšy bramnik čempijanatu Biełarusi 2012 hoda padpisaŭ kantrakt z hrečaskim kłubam «Atromitas» (pavodle schiemy 1+1). Novaja kamanda biełarusa bazujecca ŭ Afinach i zaniała ŭ minułym siezonie čaćviortaje miesca, što dazvalaje joj vystupić u Lizie Jeŭropy.
Karjera bramnika pačałasia ŭ mahiloŭskim «Dniapry», dzie jon pravioŭ piać siezonaŭ. Zatym u Harbunova było try hady vystupleńnia ŭ minskim «Dynama», ź jakim hulec dvojčy stanaviŭsia siarebranym pryzioram čempijanatu. U 2011 hodzie Harbunoŭ vystupaŭ u Hrodna, adkul pierajšoŭ u BATE. Varta adznačyć, što nabyvać z «Niomana» dla čempijona Biełarusi stała tradycyjaj: u barysaŭski kłub u roznyja hady pierajšli Siarhiej Viaremka i Siarhiej Černik.
Dva siezony ŭ BATE prynieśli Harbunovu dva čempijonskija tytuły i zvańnie najlepšaha hałkipiera pieršynstva krainy-2012. U pačatku hetaha hoda kłub prapanavaŭ šerahu hulcoŭ šukać inšuju pracu. Michaił Sivakoŭ i Zavien Badajan pierajšli ŭ «Homiel» (pieršy zatym źjechaŭ u adeski «Čarnamorac»), Harbunoŭ pałovu siezona byŭ biez pracy.
Pieršymi biełarusami, jakija vystupali ŭ Hrecyi, byli brestaŭčanie Aleh Karol i Aleh Klimaŭ (u 1990-ch hadach). U 2008 hodzie nie zusim udały siezon u hrečaskim «Panijonisie» adyhraŭ biełaruski abaronca Pavieł Płaskonny. Da apošniaha času ŭ Hrecyi vystupaŭ inšy biełaruski bramnik — Vital Žałudok, jaki ŭ kancy červienia rasstaŭsia z kłubam treciaha dyvizijona PAO z Krušonasa.
Kamientary