Niahledziačy na značnaje skaračeńnie apošnim časam impartu piva na ŭnutrany rynak Biełarusi, urad usio ž ličyć jaho ciapierašni ŭzrovień nieabhruntavanym.
Ab hetym zajaviŭ siońnia žurnalistam premjer-ministr Michaił Miaśnikovič u čas naviedvańnia AAT «Krynica», dzie pravioŭ naradu pa vynikach raboty pivavarnaj haliny za siem miesiacaŭ i chodzie vykanańnia daručeńniaŭ kiraŭnika dziaržavy pa jaje raźvićci.
«Choć za apošnija miesiacy impart istotna źmienšyŭsia (na 3%), my ličym, što heta ŭsio ž taki nieabhruntavany impart», — skazaŭ Michaił Miaśnikovič.
Premjer padkreśliŭ: «Siońnia ŭ Biełarusi stvorany ŭsie nieabchodnyja ŭmovy dla efiektyŭnaj raboty pivavarnych kampanij. My ŭpuścili siudy viadučyja suśvietnyja brendy, kab jany vyrablali piva i realizoŭvali jaho jak na ŭnutrany rynak, tak i na ekspart».
Razam z tym daloka nie ŭsie vytvorcy pracujuć tak, jak ad ich čakali. «U vyniku atrymlivajecca, što maciarynskija kampanii vyrablajuć piva, a daččynyja, jakija znachodziacca ŭ Biełarusi i źjaŭlajucca rezidentami našaj krainy, impartujuć jaho i realizujuć na ŭnutranym rynku. Takaja rabota ničoha nie vartaja», — adznačyŭ Michaił Miaśnikovič.
Urad pryniaŭ niekalki pastanoŭ, jakimi rehłamientujecca dziejnaść pivavarnych kampanij, i całkam zrazumieła, što ad ich čakajuć efiektyŭnaha vykarystańnia mahutnaściej. Apošnija miesiacy biahučaha hoda ŭ hetym napramku jość vielmi surjoznyja zruchi, adnak hetaha ŭsio jašče niedastatkova, ličyć kiraŭnik urada.
U cełym, zakranajučy pytańni pivavarnaj haliny, Michaił Miaśnikovič adznačyŭ, što jana zabiaśpiečvaje davoli vialikija abjomy pastupleńniaŭ u biudžet. Navat u 2013 hodzie pry nie samych lepšych umovach, kali piŭnaja halina pracavała drenna, jana zapłaciła kala Br1,5 trłn akcyzaŭ. Heta amal 8 pracentaŭ usich akcyznych pastupleńniaŭ.
Što datyčycca krytyki, jakaja prahučała z boku kiraŭnika dziaržavy ŭ krasaviku hetaha hoda adnosna pivavaraŭ, to heta, padkreśliŭ premjer, była abhruntavanaja krytyka. «Tamu siońnia my razhledzim pytańni efiektyŭnaści raboty haliny, a taksama źviazanyja ź impartazamiaščeńniem, pakolki asobnyja kampanii pradaŭžajuć impartavać piva dla realizacyi na ŭnutranym rynku Biełarusi, choć dla hetaha niama nijakich padstaŭ», — skazaŭ kiraŭnik urada.
Siońnia taksama płanavałasia razhledzieć efiektyŭnaść źniešnieekanamičnaj dziejnaści, ukaranieńnie najnoŭšych technałohij i pašyreńnie asartymientu vypuskajemaj pradukcyi pivavarnymi kampanijami.
Jak paviedamlałasia, paśla narady ab stanie i pierśpiektyvach raźvićcia ajčynnaj pivavarnaj haliny ŭ Łukašenki, Michaił Miaśnikovič uziaŭ chod vykanańnia dadzienych kiraŭnikom dziaržavy daručeńniaŭ pad svoj kantrol. U pačatku vieraśnia premjer užo čakaje ad kiraŭnikoŭ haliny i inšych słužbovych asob spravazdačy ab ich vykanańni.
Ciapier čytajuć
Siarhiej Cichanoŭski pierabraŭsia žyć u Łos-Andželes72
Kamientary