Piać sposabaŭ trapić na zabłakavanyja sajty (akramia vyklučanych sajtaŭ zony.by)

Z 19 śniežnia 2014 hoda ŭ Biełarusi zabłakavali šerah farmalna nie zabaronienych internet-sajtaŭ.

«Chartyja», «Biełaruski partyzan» spačatku, a zatym i Prokopovi.ch dy hazieta «Salidarnaść». Narešcie, byli zabłakavanyja damieny niezaležnaha ahienctva BiełaPAN i Naviny.by.

Sajt u zonie .by jaho možna nie prosta zabłakavać, a i adklučyć damien (jak toje zdaryłasia z Onliner.by). Tady sajt nijak nie adkryć, jon pierastaje isnavać.

A voś kali sajt u zonie .org,.com i inšych, to da jaho možna tolki zakryć dostup (praz aficyjnyja pracedury albo ŭ ich abychod).

Tady da sajta možna dabracca roznymi šlachami.

Ekanomnyja braŭziery

Niekali nadzvyčaj papularny ŭ Biełarusi braŭzier Opera maje čaroŭnuju funkcyju ściskańnia trafika — Opera Turbo albo Off-Road Mode. Jana dazvalaje nie tolki ekanomić miehabajty na limitavanych taryfach, ale i prachodzić na zabaronienyja sajty. Padobnuju funkcyju maje i raisijski Jandieks.Brauzier na bazie Chromium.

Abodva braŭziery majuć jak viersii dla nastolnych kampjutaraŭ, tak i viersii dla smartfonaŭ. Słavutaja Opera Mini stavicca praktyčna na lubuju «zvaniłku» z dostupam u internet.

Mahija adbyvajecca tak. Kab sajt hruziŭsia chutčej dy spažyvaŭ mieniej trafiku, źviestki ź jaho dastaŭlajucca nie naŭprost čytaču, a praź siervier, na jakim karcinki kanviertujucca ŭ troški nižejšuju jakaść (ale z zaŭvažna nižejšaj «vahoj»). A toj siervier-ta nie zabłakavany na ŭzroŭni pravajdera!

Minus — buduć prablemy z Flash-animacyjaj, nie ściśniecca (i moža nie adlustravacca) videa.

Da taho ž, padobnyja funkcyi možna zabłakavać na ŭzroŭni pravajdera adnym macham. Budzie skandalčyk, ale nie vialiki.

Inšyja braŭziery

Dla tych, kamu nie padabajucca Opera dy «Jandeks», taksama jość prostyja sposaby. Z dapamohaj rasšyreńnia Hola možna navučyć abychodzić błakiroŭki i Firefox, i Chrome, i navat Internet Explorer. Jano jość i dla smartfonaŭ. Dla pieršych dvuch braŭzieraŭ taksama jość rasšyreńni ZenMate i friGate na vypadak, kali vam nie spadabałasia Hola.

Adno z rasšyreńniaŭ moža «palehčy» pa niezaležnych ad nacyjanalnych błakirovak pryčynach. Ale kali pamiatać pra ŭsie try, nijakaja błakiroŭka nie strašnaja.

Ananimajziery

Časam niama mahčymaści ŭstalavać inšy braŭzier albo rasšyreńnie na jaho. U takim vypadku ŭratujuć admysłovyja sajty (veb-proksi), praź jakija možna vychodzić na zabłakavanyja resursy. Farmalna vy na dazvolenym sajcie A, nasamreč u jaho vaknie vam pakazvajecca sajt V. Biezdakorna pracuje proxfree.com, svaju nadziejnaść dakazaŭ cameleo.ru, lohka zapaminajecca nazva hide.me.

Chutkaści pry takich šlachach nie zaŭsiody ciešać, a ź videa mohuć być prablemy, zatoje ničoha nie treba ŭstaloŭvać.

VPN

Virtualnyja pryvatnyja sietki nie majuć takich niedachopaŭ, ale absalutnaja bolšaść ź ich płatnaja. Mahija takaja: vy prosicie niejkuju sietku zahruzić vašyja źviestki i sami padklučajeciesia da toj, nie zabłakavanaj dla vas sietki.

Siarod biaspłatnych raim pasprabavać FrootVPN, VPNBook ci OpenVPN, siarod niedarahich (1 dalar na miesiac) paraim prostovpn, z bolej darahich (10 dalaraŭ na miesiac) — słavuty HideMyAss. Mnohija VP majuć ułasnyja prahramy dla smartfonaŭ.

Tor

Padčas maŭklivych pratestaŭ u 2011 hodzie na rabočym stale aŭtara krasavaŭsia značyk Tor, a pad im podpis: «Siońnia sierada».

Dla tych, kamu patrebny dostup na peŭnyja sajty pry lubych umovach, a taksama dla ekstremałaŭ, jakim treba nie tolki trapić na zabłakavany resurs, ale i zastacca harantavana ananimnym, isnuje «cybulevy roŭter» Tor. Sihnał pieradajecca mnostva raz zašyfravanym i kožny pieradatčyk zdymaje tolki adnu «skurku» cybuliny šyfravańnia, kab daviedacca, kudy dalej słać sihnał.

Minusy takoha padychodu — nizkija chutkaści i niestabilnaje padklučeńnie.

Braŭzier Tor jość dla Windows, Linux i MacOS, dla iOS jość Onion Browser, a dla Android jość Orbot.

P.S. Nie zabyvajcie pra sacsietki

Niezaležna ad taho, zabłakavany sajt prosta «lažyć» pad napłyvam naviednikaŭ («Našaj Nivie» taksama nialohka vytrymlivać rezkaje padvyšeńnie ŭvahi čytača), naviny sajta možna daviedacca ŭ sacsietkach.

Kali što, my tut: UKantakcie, Facebook, Twitter.

Nie zabudźcie padpisacca na akaŭnty lubimych vydańniaŭ!

P.P.S. Pierapisvajciesia biaśpiečna

Kali zakranajecca tema błakirovak ŭ internecie, varta pryhadać i pra tajamnicu pierapiski. Złamyśniki mohuć uzłamać poštu ci vaš akaŭnt u sacsietcy. Taksama jak u vypadku ździajśnieńnia vami złačynstva śpiecsłužby mohuć zaprasić dostup da vašaha Skype-akaŭnta.

Ale jość mnostva mesendžeraŭ, nadziejna abaronienych ad uzłomaŭ dy nie skampramietavaŭšych siabie nieabhruntavanymi «zdačami» svaich klijentaŭ.

Naprykład, jašče nichto nie atrymaŭ abiacanyja 300 tysiač dalaraŭ za ŭzłom mesendžera hramadzianina Sent-Kits i Nevis Paŭła Durava Telegram. Prosta nie vyjšła złamać.

A mesendžeru ź biełaruskimi karaniami Viber daviarajuć nastolki, što navat prezident krainy, što znachodzicca ŭ stanie antyterarystyčnaj apieracyi, supakojna viadzie ŭ im pieramovy.

• 0
• 0
• 0
• 0
• 0
• 0
• 0
• 0