Zachapleńnie padletkaŭ dy moładzi enierhietyčnymi napojami, jakija nibyta dadajuć nastroju i padvyšajuć tonus dy pracazdolnaść, tryvožyć navukoŭcaŭ.
Daśledčyki Jelskaha ŭniviersiteta pravieryli bolš za 1600 vučniaŭ siarednich škoł (siaredni ŭzrost 12 hod) štata Kaniektykut. Najčaściej spažyvali enierhietyčnyja napoi chłopčyki, pryčym u bolšaj stupieni – afraamierykanskaha i łacinaamierykanskaha pachodžańnia.
U časopisie Academic Pediatrics apublikavanaja spravazdača, pavodle jakoj dzieci, jakija časta spažyvajuć enierhietyčnaja napoi, na 66 % čaściej za adnahodkaŭ pakutujuć na hipieraktyŭnaść dy sindrom deficytu ŭvažlivaści. Pryčyna tamu – jak vysoki ŭzrovień cukru ŭ napojach, tak i kafiein. Daśledčyki zvažali i na kolkaść spažyvanych napojaŭ (ad nula da siami šklanak na dzień, u siarednim – dźvie šklanki). Jany adsačyli prostuju suviaź pamiž padvyšeńniem kolkaści spažyvanych napojaŭ i rostam prablem z uvažlivaściu i hipieraktyŭnaściu. Tamu Amierykanskaja piedyjatryčnaja akademija vielmi surjozna raić baćkam abmiežavać dziaciej u spažyvańni padsałodžanych napojaŭ i kateharyčna nastojvaje, što dzieciam nielha spažyvać tak zvanyja «enierhietyki».
Normaj dla dziciaci ličycca spažyvańnie ad 20 da 30 hramaŭ cukru na dzień (u adpaviednaści z uzrostam), enierhietyčnyja i padsałodžanyja napoi časam utrymlivajuć kala 10% vuhlavodaŭ ad svajoj masy (na 60 mł Red Bull – 6,4 h vuhlavodaŭ). Heta značyć, dzicia moža lohka pierabrać cukrovuju normu ŭžo ŭ napojach, nie ličačy asnoŭnych pryjomaŭ ježy i pierakusaŭ. Heta pryvodzić da atłuścieńnia, raźvićcia chraničnych zachvorvańniaŭ, jakija pravakuje zališniaja vaha.
Kafiein, jaki ŭtrymlivajecca ŭ «enierhietykach», paśla niekalkich hadzin uzbudžeńni pryvodzić da advarotnaj reakcyi: stomlenaści, razdražnionaści, apatyi. Heta adbyvajecca praz vyčarpańnie enierhietyčnych mahčymaściaŭ arhanizma, jakomu paśla davodzicca adnaŭlacca ciaham niekalkich hadzin. Z časam dla dasiahnieńnia efiektu dozu kafieinu davodzicca padvyšać, što ryzykoŭna dla sardečna-sasudzistaj sistemy. Aproč hetaha, kafiein jak mačahonny srodak viadzie da abiazvožvańnia i zhuščeńnia kryvi.
Nahadajem praviły spažyvańnia enierhietyčnych napojaŭ dla darosłych. Chvorym na serca, dyjabiet, biassońnicu, ciažarnym i niepaŭnahadovym spažyvać «enierhietyki» niebiaśpiečna. Vy ryzykujecie, kali vypivajecie bolš za 2 porcyi na dzień. Niepažadana spažyvać kafiein ciaham 3-5 hadzin paśla «enierhietyka» – navat u vyhladzie kavy i padobnych napojaŭ. «Enierhietyki» prymajuć pierad fizičnymi nahruzkami, a nie paśla, straty vady musiać kampiensavacca vypitaj vadoj (jak minimum — u padvojnym-patrojnym abjomie ŭ paraŭnańni z enierhietyčnym napojem). Pa zakančeńni pieryjadu aktyŭnaści arhanizmu patrabujecca čas na adnaŭleńnie reziervaŭ. Kali spažyvańnie «stymulataraŭ» robicca štodzionnym i ich efiektyŭnaść padaje, rašeńnie palahaje nie ŭ padvyšeńni dozy, a ŭ časovaj admovie ad «enierhietykaŭ».
Kamientary