Da 80-hodździa Ryhora Baradulina vyjšaŭ pieršy tom jaho «Dziońnikaŭ i zapisaŭ»

Da 80-hodździa Ryhora Baradulina supolnymi vysiłkami Zhurtavańnia biełarusaŭ śvietu «Baćkaŭščyna» i Sajuza biełaruskich piśmieńnikaŭ pabačyła śviet unikalnaje vydańnie – pieršy tom dziońnikaŭ i zapisaŭ narodnaha paeta Biełarusi.

Pavialičyć

Akramia zapisaŭ z natatnikaŭ i dziońnikaŭ pieryjadu 1951—1969 hadoŭ u knihu ŭvajšli vieršy, jakija nie drukavalisia ŭ raniejšych zbornikach, siabroŭskija epihramy, vinšavańni, darčyja nadpisy, a taksama malunki i aŭtohrafy siabroŭ i znajomych paeta.

Układalnica «Dziońnikaŭ» Natalla Davydzienka, jakoj jašče pry žyćci Ryhor Ivanavič davieryŭ sparadkavać jaho zapisy dla pieradačy na zachavańnie ŭ archiŭ, raskazała, jak apracoŭvała kožny natatničak u pošukach unikalnych słovaŭ i mimalotnych ryfmaŭ, ź jakich potym naradžalisia papularnyja siońnia vieršy i paemy. Praca Natalli Davydzienka ŭžo ŭvasobiłasia ŭ takich vydańniach, jak «Vušacki słovazbor», kniha listavańnia Ryhora Baradulina z maci «Pasłaŭ by tabie dušu…» i inšych. Ale šturškom dla stvareńnia «Dziońnikaŭ i zapisaŭ» staŭ taki cikavy vypadak:

— Adnojčy Ryhor Ivanavič i Valancina Michajłaŭna zaprasili mianie ŭ hości va Ušačy, — kaža ŭkładalnica knihi. — Ja prafiesijnym vokam pačała ahladać usie natatniki, knihi i zapisy Baradulina, jakija zachoŭvalisia tam. I siarod papier znajšła dziciačy dziońnik, jaki i raspačynaje novuju knihu! Hetyja vielmi miłyja zapisy ruskamoŭnaha chłopčyka — 8-kłaśnika. Kali čytaješ ich, składana ŭjavić, što praź dziasiatki hadoŭ ź jaho vyraście narodny paet Biełarusi.

Natalla Davydzienka zhadvaje, što padčas pracy (a zbor natatak išoŭ pad pilnaj uvahaj samoha Baradulina) jany šmat śmiajalisia, a Ryhor Ivanavič časta sumniavaŭsia, ci sapraŭdy kamuści heta budzie cikava. A jak ža inačaj! «Dziońniki i zapisy» — heta i ŭspaminy padletka pra nastaŭnicu niamieckaj movy — «vieśma umnuju dobrodušnuju starušku», adznaki pa biełaruskaj movie — «razdavali diktovki po biełorusskomu jazyku. Połučił 5.» A taksama ŭspaminy pra pajezdki ŭ Łatviju, Uźbiekistan, Chakasiju.

Pavialičyć

Vydańnie azdoblenaje padrabiaznymi kamientarami, jakija cudoŭna ilustrujuć i tłumačać nam toj čas. Heta pieratvaraje «Dziońniki» ŭ cikavuju krynicu nie tolki dla amataraŭ tvorčaści Ryhora Baradulina i daśledčykaŭ-litaraturaznaŭcaŭ, ale i dla prafiesijnych historykaŭ.

Prezientacyja «Dziońnikaŭ i zapisaŭ» adbudziecca padčas viečaryny z nahody jubileju Ryhora Baradulina, jakaja adbudziecca 27 lutaha ŭ Pałacy mastactvaŭ.

Nabyć pieršy vypusk «Dziońnikaŭ i zapisaŭ (1951—1969 hh.)» nieŭzabavie možna budzie ŭ nastupnych staličnych kniharniach:

«Akademkniha» (pr-t Niezaležnaści, 72); «Kniharnia łohvinaŬ» (pr-t Niezaležnaści, 37A); «Knižny sałon» (vuł. Kalinina, 5); «Kniharnia piśmieńnika» (vuł. Kazłova, 2); «Viedy» (vuł. K.Marksa, 36); «Śvietač» (pr-t Pieramožcaŭ, 11); «Centralny knižny» (pr-t Niezaležnaści, 19); «Knihi & knižački» (pr-t Niezaležnaści, 14); Knižnaja vystava-kirmaš «Mir knih» (vuł. Janki Kupały, 27); «Eŭryka» (vuł. Kujbyšava, 75)

I ŭ internet-kramach knihi.by i prastora.by.

Kniha «Dziońniki i zapisy (1951—1959)» vyjšła namahańniami MHA «Zhurtavańnie biełarusaŭ śvietu «Baćkaŭščyna» i HA «Sajuz biełaruskich piśmieńnikaŭ» u vydaviectvie «Knihazbor» u sieryi «Biblijateka Baćkaŭščyny» («Ludzi Biełarusi»).

Źviartajem uvahu! Da hadaviny śmierci narodnaha paeta na mahile Ryhora Baradulina ŭ rodnych Ušačach na Viciebščynie płanujecca pastavić pomnik. HA «Sajuz biełaruskich piśmieńnikaŭ» i MHA «Zhurtavańnie biełarusaŭ śvietu «Baćkaŭščyna» ličać, što hodna ŭviekaviečyć pamiać — sprava honaru ŭsich biełarusaŭ, i źviartajucca da kožnaha, chto šanuje pamiać pra słavutaha biełaruskaha pieśniara, vykazać jamu svaju luboŭ i pašanu, zrabiŭšy svoj uniosak na vyrab i ŭstalavańnie pomnika. Jak dałučycca da hodnaj spravy – čytajcie tut.

• 0
• 0
• 0
• 0
• 0
• 0
• 0
• 0