U dziciačych reanimacyjach nie chapaje miedsiaścior, paviedamiła hałoŭny pazaštatny dziciačy aniestezijołah-reanimatołah Ministerstva achovy zdaroŭja Biełarusi, zahadčyca adździaleńnia aniestezijałohii-reanimacyi RNPC «Maci i dzicia» Aksana Śvirskaja 24 lutaha ŭ Minsku na naradzie pavodle vynikaŭ pracy za 2014 hod.
Ukamplektavanaść siarednim miedycynskim piersanałam dziciačych reanimacyj składaje ŭ krainie 84% (80,9% u 2013 hodzie).
«Hetaha niedastatkova, kab adekvatna ažyćciaŭlać intensiŭnuju terapiju i dohlad ciažkich pacyjentaŭ», — zajaviła śpiecyjalist.
Pavodle jaje słoŭ, u dziciačych reanimacyjach krainy nie chapaje 140 miedsiaścior. U 2014 hodzie zvolnilisia 45 miedsiaścior. Śpiecyjalist kanstatavała nizkuju zabiaśpiečanaść siarednim miedpiersanałam i ŭ RNPC «Maci i dzicia», kudy praktyčna nie raźmiarkoŭvajuć ź miedkaledžaŭ stalicy, tamu što heta nie haradskaja, a respublikanskaja ŭstanova achovy zdaroŭja. Pry hetym 70% pacyjentaŭ RNPC — žychary Minska. Pavodle słoŭ Śvirskaj, vypuskniki rehijanalnych miedkaledžaŭ nie hatovyja pierajazdžać u stalicu z-za prablem z žyllom u Minsku.
Prablema ŭkamplektavanaści ŭ RNPC vyrašajecca za košt sumiaščalnikaŭ, skazała hałoŭny pazaštatny dziciačy aniestezijołah-reanimatołah Ministerstva achovy zdaroŭja.
Jana paviedamiła, što prablema dastupnaści žylla dla miedsiaścior abvastryłasia paśla stvareńnia ŭ pačatku 2015 hoda RNPC dziciačaj chirurhii, jaki abjadnaŭ Respublikanski dziciačy kardyjachirurhičny centr i Dziciačy chirurhičny centr pry 1-j haradskoj kliničnaj balnicy Minska.
Miedycynskim siostram, jakija žyvuć u internatach stalicy, pryjšło paviedamleńnie ab tym, što jany zaraz pracujuć u respublikanskaj ustanovie, tamu pavinny vyjechać ź internata, jaki znachodzicca na bałansie Minharvykankama. «U dziciačaj chirurhii sutyknucca z tym, što miedsiostry buduć zvalniacca. Jany buduć trymacca za žyllo. Heta vielmi surjoznaja prablema», — skazała Śvirskaja.
U darosłych raenimacyjach zabiaśpiečanaść siarednim miedpiersanałam składaje 88,9%, a ŭ Minsku — pryblizna 88%, paviedamiŭ hałoŭny pazaštatny aniestezijołah-reanimatołah Ministerstva achovy zdaroŭja, kiraŭnik adździeła aniestezijałohii i reanimacyi RNPC transpłantacyi orhanaŭ i tkanak Alaksandr Dziadźko.
Jon zaznačyŭ, što mnohija prablemy ź siarednim piersanałam vyrašajucca dziakujučy ŭviadzieńniu dla miedsiaścior nadbavak za ŭdzieł u vysokatechnałahičnych apieracyjach. Razam z tym, pavodle jaho słoŭ, zastajucca pytańni racyjanalnaha padychodu da pracy miedsiaścior, jakaja «vykarystoŭvajecca na pieravozki, transparciroŭku chvorych, pracu z dakumientami zamiest taho, kab sačyć za pacyjentami».
U reanimacyjach dla darosłych nie chapaje 351 reanimacyjnaj miedsiastry. U 2014 hodzie z reanimacyj zvolnilisia 252 miedsiastry, była pryniataja 341.
Kamientary