Z rasijskaj haziety troje sutak vyrazali artykuł pra paranienaha ŭ Daniecku burata
Historyja rasijskaha tankista Doržy Batamunkujeva, jaki adkryta pryznaŭsia, što vajavaŭ i mocna abhareŭ u bai pad Debalcava, atrymała cikavy praciah.
Burackaja hazieta «Novaja Buriatija» apublikavała artykuł, u jakim maci Batamunkujeva raskazvaje, što jaje syn dahetul znachodzicca ŭ ciažkim stanie ŭ adnoj z balnic Zabajkalskaha kraja i nie atrymlivaje nijakaj dapamohi ad Ministerstva abarony Rasii.
Artykuł źjaviŭsia spačatku na sajcie, a potym i ŭ drukavanaj viersii haziety. Adnak nieŭzabavie raskaz pra los Batamunkujeva źnik z sajta (ale zachavaŭsia ŭ kešy «Huhła»). Z drukavanaj hazietaj vyjšła bolš składana: redakcyja była vymušana vyrazać artykuł z 50 tysiačaŭ asobnikaŭ užo nadrukavanaha nakładu haziety. Heta praca zaniała troje sutak.
Miž tym, hałoŭny redaktar «Novaj Buriatii» nie ličyć zdareńnie prajavaj cenzury. Hałoŭny redaktar vydańnia Cimur Duharžapaŭ raskazaŭ rasijskaj słužbie «Radyjo Svaboda», što artykuł było vyrašana vydalić praz chvalu niehatyŭnych kamientaroŭ ad ukraincaŭ, i ŭ vydańnia nie było žadańnia «ŭciahvacca ŭ infarmacyjnuju vajnu». Cikava, što «Novaja Buriatija» pazycyjanuje siabie jak niezaležnaje vydańnie.
Pra Doržy Batamunkujeva ŭpieršyniu stała viadoma, kali Iosif Kabzon naviedaŭ paranienych sieparatystaŭ u Danieckaj balnicy. Tam jon daviedaŭsia, što ŭ balnicy chłopiec z burackaha horada, dzie śpiavak davaŭ kancert, i pavitaŭ taho. Zatym z Batamunkujevym zrabiła intervju žurnalistka «Novoj haziety» Alena Kaściučenka, u jakim paranieny tankist raskazaŭ padrabiaznaści pra ŭdzieł rasijskich vajskoŭcaŭ u bajach na baku sieparatystaŭ «DNR».
Kamientary