Vučonyja-archieołahi Instytuta historyi Nacyjanalnaj akademii navuk (NAN) Biełarusi 7 krasavika zaklučyli dahavor ab supracoŭnictvie z dajvinh-centram «Marski piehas».
Jak paviedamili ŭ pres-słužbie NAN Biełarusi, z boku navukovaj arhanizacyi pahadnieńnie padpisaŭ kiraŭnik Instytuta historyi Viačasłaŭ Daniłovič, z boku dajvinh-centra — dyrektar «Marskoha piehasa» Andrej Lichačoŭ.
Zaklučeńnie hetaha dahavora razhladajecca jak «pieršy krok u spravie raźvićcia ajčynnaj padvodnaj archieałohii». Pavodle hetaha dakumienta, śpiecyjalisty dajvinh-centra buduć abśledavać vadajomy Biełarusi, a taksama dapamohuć pierapadrychtavać maładych historykaŭ u jakaści padvodnych archieołahaŭ.
Paviedamlajecca, što najbližejšym časam biełaruskija dajviery razam z archieołahami Instytuta historyi daśledujuć prykładna 50 vadajomaŭ, siarod jakich raka Studzionka (miesca pierapravy napaleonaŭskaj armii), voziera Śviciaź. Jość prapanova daśledavać navat draŭlany vadapravod u Słonimie, častka jakoha znachodzicca pad vadoj.
Archieołahi spadziajucca, što pry dapamozie prafiesijanałaŭ z «Marskoha piehasa» jany zmohuć adšukać unikalnyja pradmiety, jakija «znojduć miesca ŭ ajčynnych muziejach».
Varta adznačyć, što ŭ 2013 hodzie na rečcy Vichra pad Mścisłavam śpiecyjalisty dajvinh-centra «Marski piehas» razam z mahiloŭskimi archieołahami padniali z hłybini 3,5 mietra daśpiechi rycara Vialikaha Kniastva Litoŭskaha ChV stahodździa.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary