Va Ukrainie admovilisia ad termina «Vialikaja ajčynnaja vajna»
Viarchoŭnaja Rada Ukrainy pryniała zakon «Ab uviekaviečańni pieramohi nad nacyzmam u Druhoj suśvietnaj vajnie 1939—1945 hadoŭ». Siarod inšaha, hety dakumient uvodzić novaje śviata — Dzień pamiaci i prymireńnia, jaki buduć adznačać 8 maja.
Pry hetym 9 maja zastajecca Dniom pieramohi i ŭ dalejšym budzie aficyjnym vychodnym dniom.
U aficyjny dakumientaabarot zapuskajuć vyklučna termin Druhaja suśvietnaja vajna, a termin Vialikaja ajčynnaja bolš nie budzie ŭžyvacca.
Taksama deputaty admianili vykarystańnie savieckaj simvoliki padčas pamiatnych mierapryjemstvaŭ, jakija tyčacca Druhoj suśvietnaj vajny.
U 2011 hodzie Viarchoŭnaja Rada asobnym zakonam pryznała ściah SSSR simvałam pieramohi ŭ Vialikaj ajčynnaj vajnie. Hetaja norma bolš nie budzie dziejničać.
Taksama Viarchoŭnaja Rada pryznała bajcoŭ AUN i UPA baraćbitami za niezaležnaść Ukrainy.
«Zhodna z zakonam, usie asoby, jakija brali ŭdzieł u baraćbie paramilitarnaj, palityčnaj, u strukturach i arhanizacyjach, pryznajucca baraćbitami za svabodu i niezaležnaść Ukrainy», — zajavili aŭtary zakonaprajekta, narodny deputat z frakcyi Radykalnaj partyi Aleha Laška Juryj Šuchievič.
Jon adznačyŭ, što zakon achopić usich, chto prymaŭ udzieł u vyzvaleńni Ukrainy jašče da Pieršaj suśvietnaj vajny, a taksama Lehijon ukrainskich siečavych stralcoŭ, Centralnuju radu i ŭsie jaje orhany, Armiju Zachodnie-ŭkrainskaj respubliki, Paŭstanckija atrady Prydniaproŭja, Karpackuju sieč i Ukrainskuju paŭstanckuju armiju (UPA), a taksama palityčnyja struktury — Arhanizacyju ŭkrainskich nacyjanalistaŭ (AUN).
Pa słovach aŭtaraŭ, hetym zakonaprajektam pryznajecca fakt ahresii balšavickaj Rasii suprać Ukrainy.
Ciapier čytajuć
Ź Ministerstva kultury zvolnili pieršaha namieśnika Markava3
Kamientary