U Smalavickim rajonie raskryty kradziež 19.540 dalaraŭ.
U Smalavicki RAUS z zajavaj pra kradziež bujnoj sumy hrošaj źviarnuŭsia žychar ahraharadka Słabada.
Pavodle słoŭ mužčyny, nieviadomy z 10 pa 24 krasavika vykraŭ u jaho z doma zachavanyja pad matracam łožka 19 540 dalaraŭ, jakija jon źbiraŭ na kuplu novaj aŭtamašyny.
Pry hetym nijakich bačnych śladoŭ praniknieńnia ŭ dom haspadar nie zaŭvažyŭ. Razam z tym mužčyna nie vyklučyŭ, što ŭ adzin z hetych dzion, sychodziačy na pracu, jon moh zabycca zamknuć dźviery.
Apytańnie susiedziaŭ ničoha nie dało — nichto nie bačyŭ, kab chtości čužy padychodziŭ da doma abo prachodziŭ pa pasiołku.
Adnak pilny ahlad ekśpiertam-kryminalistam doma paciarpiełaha daŭ vynik — złodziej usio ž pakinuŭ nievialiki śled. Padčas apieratyŭna-vyšukovych mierapryjemstvaŭ supracoŭniki kryminalnaha vyšuku Smalavickaha RAUS sumiesna z kalehami z UUS Minabłvykankama i Barysaŭskaha RUUS ustanavili, što kradziež učyniła 38-hadovaja žycharka vioski Vialikaja Uchałoda Barysaŭskaha rajona.
Žančyna spačatku kateharyčna admaŭlała svajo dačynieńnie da złačynstva, adnak paśla niadoŭhaj hutarki z apieratyŭnikami, pierakanaŭšysia ŭ najaŭnaści ŭ ich dastatkovych dokazaŭ, vyrašyła napisać jaŭku z pakajańniem i vydać vykradzienyja hrošy.
Praŭda, užo nie 19 z pałovaj, a 15 tysiač dołaraŭ.
Pavodle słoŭ zatrymanaj, jana dziejničała na ŭdaču. Jašče zdalok prykmieciŭšy dom, jaki staić krychu navoddal astatnich, vyrašyła pasprabavać ščaścia tam, nibyta adčuła, dzie lažyć bujnaja suma hrošaj.
«Zrešty, taki dar u bolšaj ci mienšaj stupieni raźvity ŭ bolšaści žančyn jaje nacyjanalnaści.
Mnohija ź ich, ledź uvajšoŭšy ŭ čužy dom, adrazu «adčuvajuć», dzie haspadary zachoŭvajuć hrošy, i im dosyć pary chvilin, kab nieprymietna zabrać ich», — havorycca ŭ paviedamleńni UUS Minabłvykankama.
U dačynieńni da zatrymanaj raspačataja sprava na padstavie č. 4 art. 205 KK (kradziež u asabliva bujnym pamiery).
Kamientary