Kiraŭnik abaronnaha viedamstva ZŠA Eštan Karter zaklikaŭ spynić lubuju dziejnaść u sprečnych vodach Paŭdniova-Kitajskaha mora, bo heta pryvodzić da destabilizacyi abstanoŭki ŭ rehijonie.
Vystupajučy na forumie pa biaśpiecy ŭ Azijacka-Cichaakijanskim rehijonie ŭ Sinhapury, Karter, u pryvatnaści, padkreśliŭ, što dziejańni Kitaja iduć nasupierak mižnarodnym normam.
Kitaj nastojvaje na tym, što jamu naležyć praktyčna ŭsia akvatoryja Paŭdniova-Kitajskaha mora, na jakuju taksama pretendujuć jaho susiedzi.
Terytaryjalnuju prynaležnaść astravoŭ archipiełaha Spratli ŭ paŭdniova-zachodniaj častcy mora razam z Kitajem asprečvajuć Vjetnam, Tajvań, Małajzija, Filipiny i Bruniej.
Kitajskija budaŭniki štučna naroščvajuć płošču niekatorych sprečnych vyspaŭ, padymajučy z marskoha dna tony kamianioŭ i zhružajučy ich na padvodnyja skały.
Akramia taho, na hetym tydni była apublikavanaja novaja vajennaja stratehija KNR, zhodna ź jakoj kitajskija vajenna-marskija siły pavinny zasiarodzić svaju ŭvahu «na dalokich rubiažach krainy».
Kiraŭnik Pientahona paabiacaŭ, što ZŠA buduć naroščvać svaju prysutnaść u rehijonie, jak u pavietry, tak i na mory — «ŭsiudy, dzie heta dazvalaje mižnarodnaje zakanadaŭstva».
Pradstaŭnik Piekina na forumie u Sinhapury ŭžo nazvaŭ zajavy Kartera biespadstaŭnymi i niekanstruktyŭnymi, dadaŭšy, što palityka Kitaja ŭ dačynieńni da vyspaŭ «razumnaja i abhruntavanaja».
A pres-sakratar ministerstva zamiežnych spraŭ KNR paprasiła ZŠA «spynić pravakacyjnyja kamientary».
Kamientary