Parašenka: Aŭtary prajekta «Navarosija» pastavili na im mahilnuju plitu — asnoŭnaje z vystupu prezidenta Ukrainy

Prezident Ukrainy Piatro Parašenka pierakanany, što idei sieparatyzmu nie pryžylisia va Ukrainie nidzie, u tym liku i ŭ Danbasie. Pra heta jon skazaŭ padčas zvarotu da deputataŭ Viarchoŭnaj Rady.

«U Kramli raźličyli, što pasiejanyja rasijskimi śpiecsłužbami bacyły spravakujuć epidemiju sieparatyzmu va ŭschodnich i paŭdniovych abłaściach. Ale hetaja ideja nie znajšła padtrymki nidzie, uklučajučy Danbas. I navat na časova akupavanych rajonach Danieckaj i Łuhanskaj abłaściej sieparatysty ŭtrymlivajucca va ŭładzie tolki dziakujučy rasijskim štykam», — skazaŭ jon.

Taksama Parašenka nahadaŭ, što prajekt stvareńnia tak zvanaj «Navarosii» na ŭschodzie Ukrainy pravaliŭsia. «A nad pražektam Navarosii jaje aŭtary i pramoŭtery niekalki dzion tamu ŭłasnaručna pastavili vialikuju mahilnuju plitu», - skazaŭ jon.

Jak viadoma, raniej były deputat Rady ad PR i tak zvany «staršynia parłamienta Navarosii» Aleh Caroŭ zajaviŭ, što prajekt zakryty, bo supiarečyć minskim pahadnieńniam.

***

Taksama Parašenka zaŭvažyŭ, što ŭkraincy zmahli spynić mocnuju armiju, ale zdolnaść Ukrainy abaranić siabie ad vajennaj ahresii ŭsio jašče zastajecca minimalnaj.

«Na našych uschodnich rubiažach my spynili najmacniejšuju armiju kantynienta, bo tam suprać nas vajujuć nie šachciory i traktarysty, a, jak my dakazali ŭsiamu śvietu, rehularnyja, uzbrojenyja da zuboŭ padraździaleńni rasijskich uzbrojenych siłaŭ. Niahledziačy na pośpiechi ŭ stvareńni uzbrojenych sił treba pryznać - my na siońnia zabiaśpiečyli choć i jakasna inšy, čym hod tamu, ale ŭsio jašče minimalny ŭzrovień abaranazdolnaści dziaržavy», — skazaŭ jon.

Pa słovach Parašenki, da hetaha času nie ŭsie «dzirki załatanyja», a časam usio jašče nie chapaje samaha nieabchodnaha, tym bolš, što kolkaść armii pavialičvajecca.

Tym nie mienš, pavodle jaho słoŭ, refarmavańnie abaronnaj śfiery adbyvajecca vielmi aktyŭna, u tym liku dziakujučy vałancioram, jakija pracujuć u Minabarony. Parašenka taksama dadaŭ, što dziaržaŭnyja vydatki na abaronu ŭ Ukrainie značna vyraśli i buduć raści ŭ dalejšym.

Taksama Parašenka paabiacaŭ razabracca z aliharchami, zajaviŭšy, što prymusić manapalistaŭ mirycca z žorstkim dziaržaŭnym rehulavańniem abo pradavać svaje doli.

Prezident Ukrainy adznačyŭ, što ŭ ciapierašni čas straty ad kartelnych zmoŭ aceńvajucca ad 10 da 22% VUP, a da 40% tavaraŭ i pasłuh realizujucca na manapalizavanych rynkach.

Pavodle jaho słoŭ, heta zabivaje stymuł da ŭdaskanaleńnia.

«Ja daŭ ŭstanoŭku novamu kiraŭniku AMKU prymianić najlepšyja suśvietnyja antymanapolnyja praktyki. Ja budu dziejničać z takoj ža rašučaściu, ź jakoj 100 hadoŭ tamu Teador Ruźvielt na asnovie Antytrastavaha zakanadaŭstva spyniŭ złoŭžyvańni aliharchaŭ i viarnuŭ ZŠA ekanamičnaj kankurencyi», — zajaviŭ Parašenka.

• 0
• 0
• 0
• 0
• 0
• 0
• 0
• 0