A ŭ niadzielu sabralisia na śviatočnaje nabaženstva ŭ Biełaruskim kulturna-relihijnym centry ŭ Paŭnočnym Londanie.
28 sakavika z nahody 90-hodździa abviaščeńnia BNR adbyŭsia ŭračysty pryjom ŭ prestyžnym łondanskim hateli «Maryjot», pobač z Brytanskim parłamientam. Pryjom zładžany Zhurtavańniem Biełarusaŭ u Vialikaj Brytanii.
Ad imia ZBVB prysutnych vitała staršynia Alena Michaluk. Prysutničali biełarusy nie tolki z Łondana, ale i bližejšych haradoŭ.
Ź vitalnym słovam da prysutnych źviarnulisia: staršynia Rady BNR Ivonka Surviłła; były ambasadar Brytanii ŭ Minsku, siabar Biełarusi Brajan Benet; były palitviazień Andrej Klimaŭ; paet, sustaršynia Ahulnanacyjanalnaha arhkamitetu pa śviatkavańni 90-hodździa BNR Hienadź Buraŭkin; staršynia Rady Zhurtavańnia biełarusaŭ śvietu «Baćkaŭščyna» Alena Makoŭskaja; staršynia Anhła-biełaruskaha tavarystva Džejms Dynhli. Vioŭ uračystuju imprezu siabra rady ZBVB Pavieł Šaŭcoŭ. Ahulnym padarunkam dla ŭsich stała prezientacyja muzyčnaha albomu «Dzień Voli – 90 hod», zapisany Ninaj Evans i Sieržukom Vinahradavym.
Jak adznačyŭ prysutny na śviacie ajciec Siarhiej Stasievič, «dla biełarusaŭ dyjaspary dzień 25 Sakavika – vialikaje śviata, jak nacyjanalny dzień dla inšych narodaŭ, što žyvuć u Brytanii (naprykład, jak dzień Śviatoha Patryka dla irłandcaŭ). I tak było zaŭsiody. Vielmi škada, što da siońnia ŭ Biełarusi Dzień Voli nie śviata, a supraćstajańnie. Vieru ŭ toje, što situacyja ŭ chutkim časie źmienicca i na Radzimie».
30 sakavika biełarusy sabralisia na śviatočnaje nabaženstva ŭ Biełaruskim kulturna-relihijnym centry ŭ Paŭnočnym Łondanie. Nabaženstva skončyłasia malitvaj za biełaruski narod, pračytanaj ajcom Alaksandram Nadsanam.
Paśla słužby adbyłasia sustreča z haściami ź Biełarusi. Mikoła Pačkajeŭ, namieśnik staršyni ZBVB, pryvitaŭ prysutnych, padkreśliŭšy vialikuju rolu biełarusaŭ zamiežža ŭ zachavańni ideałaŭ 25 Sakavika, a taksama vykazaŭ udziačnaść za pracu tym u Biełarusi, chto padzialaje hetyja ideały. Hienadź Buraŭkin pračytaŭ novyja vieršy, a taksama ŭryvak z paemy, pryśviečanaj Francišku Bahuševiču. Alena Makoŭskaja i Nina Šydłoŭskaja raspaviali pra dziejnaść ZBS «Baćkaŭščyna». Zachopleny vieršami Hienadzia Buraŭkina, biełaruska-cyhanski paet z Łondana Valdemar Kalinin pračytaŭ svoj tvor, pryśviečany Biełarusi, na dźviuch movach – biełaruskaj i cyhanskaj. Chvalavali prysutnych roznyja temy – i situacyja ŭ Biełarusi, i pierśpiektyvy ŭzajemajednosinaŭ Radzimy i biełarusaŭ zamiežža, i prablemy movy, kultury, školnictva.
Praciaham Dzion BNR u Łondanie budzie sustreča ŭ Biełaruskim domie, zapłanavanaja na 1 krasavika.
Kamientary