Niedziaržaŭnaja hazeta «Novy Čas» atrymała adrazu dva papiaredžańni ad Ministerstva infarmacyi.
Papiaredžańni padpisała 25 sakavika namieśnica ministra infarmacyi Lilija Ananič. Jak paviedamiŭ pres‑słužbie BAŽ šef‑edaktar vydańnia Alaksiej Karol, redakcyja daviedałasia pra heta ŭ minułuju piatnicu.
Pieršaje papiaredžańnie vyniesiena pavodle art. 11 Zakona «Ab druku…» — za toje, što vydańnie ŭ naležny termin piśmova nie painfarmavała rehistrujučy orhan pra źmienu movy vychadu. U rehistracyjnym paśviedčańni paznačana, što «Novy Čas» vychodzić na biełaruskaj i polskaj movach, a № №3,5,6,8 za hety hod vyjšli na biełaruskaj i ruskaj movach, — havorycca ŭ papiaredžańni Mininfarmacyi.
U druhim papiaredžańni abvinavačańni vystaŭlajucca pa art. 2 i 26 Zakona «Ab druku…». Mininfarmacyi paličyła, što ŭ vychodnych dadzienych haziety niapravilna ŭkazany kiraŭnik redakcyi — pryvatnaha vydavieckaha unitarnaha pradpryjemstva «Čas navinaŭ». Akramia hetaha, pretenzii ministerstva vyklikała toje, što ŭ vyšejpieraličanych numarach haziety zamiest adnoj daty vychadu vydańnia ŭkazvajucca dźvie.
Alaksiej Karol śćviardžaje, što Mininfarmacyi pamylajecca, bo kiraŭnikom redakcyi «Novaha Času» sapraŭdy źjaŭlajecca Alena Anisim — jak i paznačana ŭ vychodnych dadzienych. A ŭkazańnie dźviuch dat u kožnym numary štotydniovika papiarednie ŭzhadniałasia ź Ministerstvam infarmacyi. Što da źmieny movy, to, pavodle Alaksieja Karala, pa‑rusku ŭ vydańni drukavałasia tolki prahrama telebačańnia.
Alaksiej Karol ličyć, što pretenzii ministerstva nadumanyja, bo «nie było bolš zašto čaplacca». Jon paviedamiŭ taksama, što najbližejšym časam źbirajecca abskardžvać sankcyi Ministerstva.
Jak paviedamiŭ pres‑słužbie BAŽ kiraŭnik siektaru rehistracyi ŚMI i kantrolu za vykanańniem zakanadaŭstva Mininfarmacyi Viktar Hurecki, kali redakcyja vypravić zhadanyja niedachopy, to nijakija bolš žorstkija sankcyi joj nie pahražajuć. Jon zaznačyŭ taksama, što za ŭkazańnie padvojnych dat vychadu ministerstva ciapier budzie karać i inšyja vydańni.
Ciapier čytajuć
Za «ekstremisckija» padpiski pry praviercy na miažy bolš nie sadžajuć na sutki12
Za «ekstremisckija» padpiski pry praviercy na miažy bolš nie sadžajuć na sutki
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary