Ministerstva kultury razhladaje zvarot hramadzkaści ab nadańni bieł-čyrvona-biełamu ściahu statusu niemateryjalnaj historyka-kulturnaj kaštoŭnaści.
Ministerstva kultury razhladaje zvarot hramadskaści ab nadańni bieł-čyrvona-biełamu ściahu statusu niemateryjalnaj historyka-kulturnaj kaštoŭnaści. Pra heta paviedamiŭ u interv́ju BiełaPAN staršynia hramadskaha abjadnańnia «Biełaruskaje dobraachvotnaje tavarystva achovy pomnikaŭ historyi i kultury» Anton Astapovič. Takim čynam, zaznačyŭ jon, na čas razhladu hety ściah znachodzicca pad achovaj dziaržavy.
Z prapanovaj uklučyć bieł-čyrvona-bieły ściah u Dziaržaŭny śpis niemateryjalnych historyka-kulturnych kaštoŭnaściaŭ Respubliki Biełaruś staršynia abjadnańnia źviarnuŭsia ŭ Minkult 26 lutaha ŭ suviazi z 90-hodździem abviaščeńnia Biełaruskaj Narodnaj Respubliki.
U adkazie na adozvu hramadskaści namieśnik ministra, staršynia Biełaruskaj respublikanskaj navukova-mietadyčnaj rady na pytańniach historyka-kulturnaj spadčyny Uładzimir Hrydziuška paviedamiŭ, što prapanova tavarystva «z metaj atrymańnia dadatkovych źviestak» nakiravana ŭ Instytut historyi i Instytut mastactvaznaŭstva, etnahrafii i falkłoru imia Kandrata Krapivy Nacyjanalnaj akademii navuk Biełarusi.
U interv́ju BiełaPAN A. Astapovič zaznačyŭ, što 31 sakavika jon piśmova źviarnuŭsia ŭ vyšejnazvanyja akademičnyja ŭstanovy z prapanovaj uklučyć pradstaŭnikoŭ tavarystva ŭ skład ekśpiertnych kamisij, jakija buduć razhladać adozvu hramadskaści ab nadańni bieł-čyrvona-biełamu ściahu statusu historyka-kulturnaj kaštoŭnaści. Pavodle jaho słoŭ, na pieryjad razhladu prapanovy bieł-čyrvona-bieły ściah achoŭvajecca dziaržavaj zhodna z artykułam 22 zakona «Ab achovie historyka-kulturnaj spadčyny».
Bieł-čyrvona-bieły ściah z 1991 pa 1994 hady byŭ adnym ź simvałaŭ biełaruskaj dziaržaŭnaści, a bieł-čyrvona-biełyja stužki źjaŭlajucca elemientami simvoliki zarehistravanaha hramadskaha abjadnańnia «Tavarystva biełaruskaj movy imia Franciška Skaryny» i Biełaruskaha ekzarchatu Rasiejskaj pravasłaŭnaj carkvy. Niekalki hadoŭ tamu hierb «Pahonia» byŭ uklučany ŭ Dziaržaŭny śpis niemateryjalnych historyka-kulturnych kaštoŭnaściaŭ Respubliki Biełaruś.
Kamientary