Na ŭčorašnim kancercie‑mitynhu, pryśviečanym hetak zvanamu Dniu jadnańniu Biełarusi i Rasiei anansavaŭsia vystup niekalki viadomych rok‑hurtoŭ, ale bolšaść ź ich admoviłasia vychodzić na scenu.
Lider hurta Tav.Mauzer Janka kaža, što byŭ vielmi ździŭleny, kali ŭbačyŭ abviestki pra kancert na infarmacyjnych sajtach:
‑ Dobra, što hetaja infarmacyja źjaviłasia pozna i nie zmahła dezinfarmavać prystojnuju kolkaść našych fenaŭ. Tym nie mienš, dla taho dziesiatku čałaviek, jaki tak i nie dačakaŭsia vystupu ŭlubionaj kamandy, paviedamlajem: naš vystup tam nie płanavaŭsia, usia infarmacyja pra jaho heta albo pamyłka, albo śviadomaja dezinfarmacyja.
Sa słoŭ Janki Maŭzera, arhanizatary kancertu sapraŭdy źviartalisia da jaho z prapanovaj vystupić na płoščy Banhałor, ale damoŭlenaść dasiahnutaja nie była.
‑ Nam ź niejkaha pieryjadu stała niepryjemnym udzielničać u roznaha kštałtu palityčnych akcyjach. Bo za skandavańniem łozunhaŭ hublajecca asnoŭnaje — muzyka. Tamu prośba da arhanizataraŭ: nadalej u rekłamnych materyjałach vykarystoŭvać nie «vierahodna», a «nam by chaciełasia», ci niejtralnaje «viaducca pieramovy».
Łaŭreaty apošniaha «Basovišča» — hurt UNIA pahadzilisia syhrać na Banhałor u hety dzień. Muzyki pryjšli ź instrumientami da sceny, ale ŭ apošni momant admovilisia ad svajho setu.
‑ Nam tak i nie patłumačyli, što tam adbyvałasia — akcyja, pryśviečanaja Dniu jadnańnia Biełarusi i Rasii ci akcyja salidarnaści z palitviaźniami. Usio vyhladała miakka kažučy mlava: niekalki dziesiatkaŭ čałaviek, sabralisia ŭ asnoŭnym babulki, a navokał na łavach «pacany z rajonu» pjuć harełku. Z punktu hledžańnia palityčnaj akcyi było niejasna, a z punktu hledžańnia arhanizacyi kancertu — poŭny nul. Tamu my pryniali rašeńnie nie vystupać, — kaža lider hurtu Paša.
U vyniku ź piaciorki zajaŭlenych kamandaŭ syhrała tolki adna — «Mutnaje voka». Jaje vakalist Jaŭhien Zmuška kaža:
‑ Nam usio roŭna dzie hrać. Jość cudoŭny aparat, padyšli našy siabry — čamu by nie vystupić?.
Adziny momant, jaki nie spadabaŭsia muzykantu — było vielmi mała ludziej. A paśla vystupu hienierała Bokava, jaki zajaviŭ, što «bieł‑čyrvona‑bieły ściah — heta ściah palicajaŭ i zdradnikaŭ», publiki stała jašče mieniej.
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club3
Kamientary