Siabra zackavanaha ŭ Rasii vučnia Ułada Kaleśnikava za palityku źmiaščali ŭ psichijatryčnuju kliniku

Mikałaj Padhornaŭ raspavioŭ radyjo «Svaboda», jak jaho «lačyli» ad palityčnych pohladaŭ.

Pavialičyć

Mikałaj kaža, što ciapier pje siedatyŭnyja preparaty. Nie viedaje, jak spravicca inakš sa svaim stanam. «Ja da hetaha času nie mahu pavieryć, što Ŭład pamior. Kožny dzień płaču. U mianie byŭ adzin sapraŭdny siabar. My vielmi padobnyja šmat u čym, ale ja ŭmieju być dyplamatyčnym, kazać ludziam toje, što jany chočuć pačuć. A Uład byŭ bieskampramisny va ŭsim. Jon nie ličyŭ patrebnym kryvadušničać i chłusić dziela ŭłasnaj biaśpieki», - kaža Mikałaj.

U kastryčniku baćki pakłali Mikałaja ŭ vostraje adździaleńnie padletkavaha centra pry maskoŭskim psichijatryčnym špitali №15. «Ja daŭ zhodu na špitalizacyju pad upłyvam siamji i psichijatra. Jon mnie zajaviŭ: «Kali chočaš, kab ź ciabie, asacyjalnaha elemienta, zrabili hodnaha člena hramadstva, treba lačycca». Davali samyja mocnyja preparaty: hałapierydoł, amitrypcilin, akinieton, prapazin. «U volny ad lačeńnia čas z-za pabočnaha efiektu lekaŭ ja moh tolki tupa chistacca z boku ŭ bok. Hałava była jak u tumanie, ja nie moh pračytać ni radka. Na pavietra mnie vychodzić nie dazvalali, časam udavałasia ŭhavaryć sanitara pravietryć pałatu pierad snom», - kaža Mikałaj.

Jaho vypisali za niekalki dzion da paŭnalećcia. Lekary tak i skazali: «My nie chočam zajmacca afarmleńniem papier, pierakładać ŭ darosłaje adździaleńnie». Paśla vypiski z balnicy Mikałaj pad kantrolem baćkoŭ praciahvaŭ prymać niejraleptyki.

Baćki adsialili jaho da babuli. Jany nie chočuć, kab Mikałaj mieŭ znosiny z małodšym bratam.

* * *

18-hadovy Uład Kaleśnikaŭ skončyŭ žyćcio samahubstvam 25 śniežnia. Imia junaka stała šyroka viadoma ŭ červieni 2015 hoda, kali jon pryjšoŭ na zaniatki ŭ futbołcy z ukrainskim ściaham i nadpisam «Viarnuć Krym!», a taksama vyviesiŭ u Padolsku, dzie jon vučyŭsia, antyvajenny łozunh. Paśla hetaha Uład byŭ adličany z technikuma. Im zacikavilisia śpiecsłužby: palicyjanty prychodzili i pytalisia, adkul jon uziaŭ futbołku. Dzied, prychilnik Pucina, adpraviŭ jaho da baćki, u Žyhuloŭsk. U vajenkamacie jon uklučyŭ zapisany himn Ukrainy i admoviŭsia iści ŭ vojska.

Historyja Ułada Kaleśnikava stała šyroka viadomaja, pra jaho pisali i rasiejskija, i zachodnija ŚMI. Jon vioŭ papularny błoh i ŭdzielničaŭ u šerahu apazicyjnych hrup u «fejsbuku». Adnak u Žyhuloŭsku Uład nie znajšoŭ supolnaj movy sa svajakami i skardziŭsia na ckavańnie z boku adnahodkaŭ:

«Adnosiny ź ludźmi prosta žach — užo abiacali pabić, kidali ŭ mianie brud i śniežki, pastajannyja abrazy i šturchańnie łokciami ŭ kalidorach. Navat adzin daŭ u tvar (niamocna, na ščaście). Mnie nielha źviartacca ŭ palicyju (tyja jašče ŭletku dali zrazumieć, što dapamahać mnie nie buduć i, pracytuju, «sam by tabie ŭ mordu daŭ za takija rečy…» U Žyhuloŭsku tut sa mnoj naohuł što zaŭhodna mohuć zrabić. Adčajna šukaju, kudy možna źjechać», — pisaŭ jon u listapadzie karespandentu Radyjo Svaboda.

25 śniežnia Uład Kaleśnikaŭ pryniaŭ śmiarotnuju dozu lekaŭ. Palicyja paviedamiła, što vyratavać jaho nie ŭdałosia.

• 0
• 0
• 0
• 0
• 0
• 0
• 0
• 0