Chviedaru Niuńku – 80

Jak žyć, dyk žyć dla Biełarusi.

A bieź jaje navošta žyć?

Łarysa Hienijuš

Tak koracieńka možna acharaktyzavać asobu staršyni Tavarystva Biełaruskaj Kultury ŭ Litvie, čalca Preziduama Rady Biełaruskaj Narodnaj Respubliki Chviedara Niuńku, jakomu 6 krasavika spoŭniłasia 80.

Amal dva dziesiacihodździ jon pradstaŭlaje biełaruskuju hramadzkaść Litvy. Dziakujučy jaho entuzijazmu, addanaści Biełarusi, ŭ sioniašniaj Litvie viedajuć i ab biełarusach i ab ich prablemach.

Adznačyć jubilej hetaha šanoŭnaha čałavieka i raździalić ź im jaho radaść pryjšło blizu sta čałaviek. Hetym i było zaśviedčana, nakolki jon pavažany ŭ hramadztvie.

Chviedara Niuńku viedajuć i pavažajuć nie tolki siarod biełarusaŭ śvietu, ale i siarod litoŭcaŭ. Heta padćviardžajecca tym, što vinšavańni jon atrymaŭ ad hłavy kabineta ŭrada Litoŭskaj Respubliki premjer-ministra Hiedyminasa Kirkiłasa, ad śpikiera Sojmu ŁR Česłavasa Juršenasa i ad inšych instytucyj Respubliki.

Chvalujučym momantom dla ŭsich byŭ toj, kali pavinšavać pryjšoŭ prafesar-deputat Vitaŭtas Łandsberhis, deputat Eŭraparlamentu Łajma Andrykienie, zaznačyŭšy tym samym pavahu da jubilara. Byli miž inšym i čalcy Litoŭskaha sojma. Ad Departamienta nacyjanalnych mienšaściaŭ jubilant atrymaŭ załaty miedal, jaki ŭručajecca tolki nadzvyčaj zasłužanym siabram.

Dalej jaho vitali šmatlikija hości, prybyŭšyja na jubilej z roznych kutkoŭ ziamli. Varta adznačyć, što siarod ich byli akademiki Radzim Harecki i Anatol Hryckievič, piśmieńniki Volha Ipatava i Hienadź Buraŭkin, staršynia EBS “Baćkaŭščyna” Alena Makoŭskaja, staršynia Tavarystva Biełaruskaj Movy Aleś Trusaŭ, Staršynia Biełaruskaha Narodnaha Frontu Lavon Barščeŭski, dyrektar začynienaha Biełaruskaha liceju Uładzimir Kołas, prafesar Jury Bandažeŭski i šmat inšych viadomych i pavažanych ludziej. Z Prahi pryvitaŭ Jurka Stankievič, ź Biełastoku redaktar biełaruskaj haziety „Niva“ Jaŭhien Vapa.

Ź jubilejem pryvitała i Prezident Biełaruskaj Narodnaj Respubliki Ivonka Surviłła.

***

Idzie historyja, ale zastajucca ludzi, jakija jaje tvaryli. Tak voś i tut, u Litvie, nie mahčyma ŭjavić biełaruskaje žyćcio biez Chviedara Niuńki. I hety 80-hadovy jubilej hetaje padćvierdziŭ. I jak adznačali šanoŭnyja pramoŭcy, što susiedzieŭ nie vybirajuć, realii dyktujuć, što im treba žyć pobač. Ale peŭny narod, nacyja mnohimi ŭsprymajucca cieraź niejkuju asobu, i voś, viedajučy i hledziačy na Chviedara Niuńku, litoŭcam možna tolki pazajzdrościć, što im Boham dadziena mahčymaść pad bokam mieć takich susiedziaŭ, jak šanoŭny jubilant.

Nie hledziačy na svaje 80 (a chiba heta šmat, heta tolki imhnieńnie: urešcie rešt čałaviek i jaho žyćcio vymierajecca nie kalandarnymi hadami, a hadami ŭ jaho dušy, jakija začastuju biahuć inačaj) spadar Chviedar i siońnia vyhladaje maładym, žyćciaradasnym, poŭnym entuziazmu, a hałoŭnaje nadziei i taje nadziei, što čarhovy jubilej daviadziecca adznačać u volnaj i demakratyčnaj Biełarusi. I heta zaznačali jak šanoŭny jubilant, tak i hości, prybyŭšy raździalić z čałaviekam jaho hady.

Chaciełasia b dałučycca da ŭsich vinšavańniaŭ i skazanych słovaŭ i tolki naprykancy zaznačyć, što ja maju honar być asabista znajomym z Chviedaram Niuńkam.

• 0
• 0
• 0
• 0
• 0
• 0
• 0
• 0