Nasta Daškievič u detalach raskazała pra raddom i prychod na śviet Davida
«Usim vialikaja padziaka za vinšavańnie! Narešcie my doma! — napisała Nasta Daškievič u svaim fejsbuku. — Mara nosić Davidu svaich miadźviedzikaŭ, vyciraje jamu rocik, sprabuje zaleźci da jaho ŭ łožačak, kab lehčy pobač ci ŭziać na ručki, a taksama stała i ŭparta zabiraje pustyšku.: )
Adrazu zrazumieła, što heta lala i jość toj bracik, pra katoraha joj tak šmat kazali. Pakul jon šmat śpić jość čas dla Mary adaptavacca, bo čas dla jaje byŭ niaprosty. Niahledziačy na toje, što my raniej pakidali małoje niedzie na 4 dni, kali my adjazdžali kudy sa Źmitrom ci ja źjazdžała na vučobu, ciapier jana vielmi sumavała. A zaraz nie pakidaje mianie z pola zroku i ŭvieś čas uskrykvaje: «Mama tut! Mama tut!»
Ciapier pra rody i raddom. Pakolki heta było aktualnym u apošni čas, było šmat publikacyj i my šmat dzialilisia mierkavańniem, padzialusia i ja svaim dośviedam, pakul tak by mović, pamiać śviežaja. Na rody mnie ŭ pryncypie nie šancuje, bo prachodziać doŭha i składana. Tamu ja mahu adčuć na siabie mnohija vabnoty sučasnaj miedycyny. Ale ŭ hety raz, u adroźnieńnie ad minułaha, mnie niama na što asabliva skardzicca.
Pa pieršaje, mianie pakłali ŭ absiervacyju 1-ha špitala, pakolki ja nie ŭsich lekaraŭ prajšła padčas ciažarnaści. I skažu ja Vam, kali b ja viedała zahadzia, što ŭ absiervacyi nastolki mocna adroźnivajucca ŭmovy ad zvyčajnaha paślarodavaha adździaleńnia, ja b tych lekaraŭ nikoli ŭ žyćci nie prachodziła! ))
Naradžała ja adna ŭ pałacie, byŭ fitboł. Tradycyjna ja ź jaho faktyčna i nie złažu nikoli padčas schopak.
Usie akušerki i lekary faktyčna byli pobač, časta zachodzili pytalisia, jak ja.
U minuły raz, chto ŭ kursie, da mianie nikomu nie było spravaŭ hadzin 4—5. Dazavali pastajanna aksitacyn i abiezbolvajučaje, pakolki tradycyjna ŭ mianie spačatku adychodziać vody, a rodavaja dziejnaść słabaja. Se la vi.
Pa ŭmovach usio vielmi akuratna. Post akušerki ŭ mianie za dźviaryma, radzała za try kroki.
U minuły raz u zvyčajnym adździaleńni da radzały, kali pačalisia patuhi, tre' było iści praz kalidor. Jak pryhadaju, tak strašna stanovicca.
Kresła naviejšaje, čym u zvyčajnym rodavym. Prynamsi, ja ŭ im dastavała da ručak, što niesumnienna plus.
Što da lekaraŭ i akušeraŭ. Spačatku z adnoj akušerkaj adnosiny ŭ nas byli nie załadzilisia. Nahodaju stała biełaruskaja mova:) Jana zrabiła mnie zaŭvahu, što słova «tusavacca» ŭ biełaruskaj movie niama, tamu havarycie narmalna. Tut da mianie padyšła staršaja miedsiastra ad majoj znajomaj, spytacca, što ŭ mianie čuvać. Paśla hetaha i akušerka stała našmat milejšaj. U pryncypie, jana žančyna dobraja. Prosta, vidać, dzień nie załadziŭsia. Bo jana mnoha dapamahała, pieražyvała, jak prachodziŭ praces.
Lekary mnie papalisia ŭsie strohija, ale akuratnyja. Kažuć, što jany zazvyčaj padbirajuć słovy ŭ zaležnaści ad asoby, kaho treba chvalić i pieścić, a kamu i žarca dać, kab lepš prajšoŭ praces. Maŭlaŭ, jak dobry ci kiepski śledčy, tolki ŭ pakoi niechta adzin ź ich. Dyk voś, z majoj asobaj jany trošku pamylilisia. Stymulavać mianie słovami pra «heta tolki vaša dzicia, aproč vas jon nikomu nie patrebny» było pamyłkaj i zamiest «e-hie-hiej, ščas padnacisnu» mnie chaciełasia pračytać im lekcyju pra toje, što heta jak minimum niekarektna čuć ad čałavieka, jaki na pryniaćci hetych dzietak u śviet śpiecyjalizujecca. Ale niachaj. Času na lekcyi nie było — pryjšłosia naradžać.
U adzialeńni paślarodavym akuratnyja pałaty pa dva i try čałavieki. Pa dva — płatnyja, pa try — biaspłatnyja. Ja lažała ŭ płatnaj pałacie, ale pobač sa mnoju lažała dziaŭčyna biaspłatna, bo inšych miescaŭ nie było. ) Heta było vielmi zabaŭna. Ale ja była nie suprać, bo ź mienšaj kolkaściu ludziej pryjšłosia damaŭlacca pra toje, što vokny treba adčyniać. Bo batarei smažać biaźlitasna. Heta minus, a tak usio, što datyčna pałaty, — tłusty plus dla biełaruskaj realnaści. Bo niejak mnie pryjšłosia spuścicca na paru pavierchaŭ nižej, i ja znoŭ ubačyła hetyja ahromnistyja pałaty pa 6—7 čałaviek albo błočnyja z padvojennaj kolkaściu ludziej i ŭsio heta, viadoma, nie natchniaje.
Jak dzikovina jašče toje, što prychodziła fizijaterapieŭtka, jakaja pakazvała praktykavańni, raiła roznyja pracedury. Adčuvałasia, što da ciabie navat jość sprava», — zadavolenaja Nasta Daškievič.
Kamientary