U Staŭrapali (RF) pačalisia słuchańni kryminalnaj spravy ŭ dačynieńni da błohiera Viktara Krasnova, jakoha ekśpiertyza pryznała vinavatym u abrazie pačućciaŭ viernikaŭ. U kastryčniku 2014 hoda Krasnoŭ, viedučy sprečku ŭ adnoj z hrup sacsietki «UKantakcie», napisaŭ frazu «Boha niama» i nazvaŭ Bibliju «zbornikam habrejskich kazak».
Pra pačatak razboru napisaŭ u fejsbuku pravaabaronca Pavieł Čykaŭ. «Ciapier pačalisia słuchańni kryminalnaj spravy miravym sudździoj Pramysłovaha rajona Staŭrapala. Błohiera Viktara Krasnova ŭ Staŭrapali sudziać pa novaj redakcyi art. 148 KK RF (Abraza pačućciaŭ viernikaŭ), pryniataj paśla spravy Pussy Riot», — napisaŭ jon.
Jak paviedamlajecca, ateistyčnyja vykazvańni Krasnova abrazili dvaich jaho surazmoŭcaŭ, jakija napisali na błohiera zajavy ŭ palicyju. Da kanca hoda śledčy adździeł pa Pramysłovym rajonie Staŭrapala pieradaŭ u prakuraturu abvinavačvańnie pa artykule ab abrazie pačućciaŭ viernikaŭ. Krasnovu pahražaje da troch hadoŭ źniavoleńnia ŭ kałonii.
Jak raspavioŭ Krasnoŭ, u dačynieńni da jaho vykazvańnia była praviedzienaja linhvistyčnaja ekśpiertyza. U zaklučeńni ekśpiertaŭ, skan jakoha pryvodzić vydańnie Hrani.Ru, havorycca, što vykazvańnie adnosicca nie da ludziej, a da relihijnych dahmataŭ, a tamu abrazaj hodnaści paciarpiełych nie źjaŭlajecca. Adnak, praciahvajuć ekśpierty, «vykazvańni nosiać abraźlivy charaktar pravasłaŭnaha chryścijanstva i nakiravanyja na prynižeńnie (abrazu) relihijnych pačućciaŭ viernikaŭ».
Taksama ŭ intervju «Hraniam» Krasnoŭ paviedamiŭ, što na jaho telefon paśla sprečki pra Boha ŭ sacsietcy pačali prychodzić ananimnyja pahrozy.
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?
Kamientary