U Minskim haradskim sudzie praciahvajecca praces pa samaj hučnaj u historyi Biełarusi spravie ab raspaŭsiudžvańni narkotykaŭ. Čaćviorty dzień idzie dopyt abvinavačvanaha Marata Bahiela. Abvieščanyja pakazańni padsudnaha, jakija jon daŭ na stadyi papiaredniaha śledstva. U pryvatnaści, Bahiel pradstaviŭ schiemu, jak supracoŭniki KDB i MUS «kryšavali» narkadyleraŭ.
Hałoŭnym fihurantam spravy pravaachoŭniki nazyvajuć Kanstancina Viluhu, 31-hadovaha žychara Minska. U abvinavačvańni adznačana, što ŭ 2011 hodzie jon stvaryŭ sajt LegalMinsk, praź jaki raspaŭsiudžvalisia zabaronienyja rečyvy. Pavodle źviestak hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj (HUBAZiK) MUS, Viluha kantralavaŭ praktyčna ŭvieś rynak psichatropaŭ u krainie, a taksama zdoleŭ stvaryć filijały ŭ rasijskich haradach.
Bahiel, z dopytu jakoha pačaŭsia sud, zajmaŭsia raspaŭsiudžvańniem kurylnych sumiesiaŭ u Rasii. Viadoma, što jon zaklučyŭ dasudovaje pahadnieńnie, h.zn. pryznaŭ vinu i aktyŭna supracoŭničaŭ sa śledstvam. Abvinavačany napisaŭ čatyry jaŭki z pakajańniem. U adnoj ź ich jon padrabiazna raśpisaŭ schiemu, jak pravaachoŭniki «kryšavali» narkadyleraŭ.
Tak, pavodle słoŭ Bahiela, na čale ŭsioj złačynnaj hrupy stajaŭ Viluha, jakomu padparadkoŭvałasia čatyry čałavieki: Kanstancin z HUBAZiK, Dźmitryj z KDB, Andrej Silin i Andrej Pracevič. Apošni prachodzić abvinavačvanym pa «spravie 17». Na łavie padsudnych taksama dva byłyja supracoŭniki KDB — Dźmitryj Vieracienski i Ihar Karycki — i były rabotnik HUBAZiK MUS Kanstancin Dzienisievič.
U złačynnaj schiemie, sa słoŭ Bahiela, taksama fihuravali Siarhiej Rybko (uznačalvaŭ filijały ŭ Rasii, zaraz zatrymany, vyrašajecca pytańnie ab jaho ekstradycyi ŭ Biełaruś) i jašče dva supracoŭniki HUBAZiK — Silin (ciozka albo svajak vyšejnazvanaha Silina) i Makuryn.
Sa słovaŭ advakataŭ Viluhi viadoma, što jaŭki z pakajańniem, jakija daŭ Bahiel, napisanyja roznym počyrkam. Ale abvinavačvany nastojvaje, što jon ułasnaručna pisaŭ usie zajavy. «U mianie počyrk mianiajecca, jak nastroj», — zajaviŭ jon u sudzie. Počyrkaznaŭčaja ekśpiertyza pa hetym pytańni pakul nie pravodziłasia.
U sudzie abvieščany pierapynak da 10 sakavika.
Ciapier čytajuć
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?20
Što viadoma pra žančynu, jakaja zahinuła ŭ aŭtobusie, što vioz biełaruskich futbalistaŭ-školnikaŭ u Hielendžyk?
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu2727
Kamientary