Partyja BNF patrabuje ad Hienprakuratury pryznać «Načnych vaŭkoŭ» ekstremisckaj arhanizacyjaj

Staršynia Partyi BNF Alaksiej Janukievič 3 maja nakiravaŭ u Hienieralnuju prakuraturu zajavu z patrabavańniem pryznać rasijski bajkierski kłub «Načnyja vaŭki» ekstremisckaj arhanizacyjaj.

Pavialičyć

Padstavaj dla zajavy, paviedamlaje pres-słužba partyi, stali niadaŭnija vykazvańni lidara maskoŭskich «Načnych vaŭkoŭ» Alaksandra Załdastanava, jaki 30 krasavika znachodziŭsia ŭ Biełarusi. Jon zajaviŭ, što «Biełaruś — heta Rasija».

Janukievič prosić hienieralnaha prakurora ŭ metach vykanańnia zakona «Ab procidziejańni ekstremizmu» źviarnucca ŭ Viarchoŭny sud z zajavaj ab pryznańni «Načnych vaŭkoŭ» ekstremisckaj arhanizacyjaj i zabaranić ich dziejnaść na terytoryi Biełarusi.

«Nachabnaja zajava Załdastanava vidavočna skiravana na niepryznańnie Respubliki Biełaruś jak niezaležnaj dziaržavy i maje na mecie padryŭ terytaryjalnaj cełasnaści našaj dziaržavy, — ličyć Janukievič. — Zakanadaŭstva pra baraćbu z ekstremizmam, jakoje akurat niadaŭna było značna ŭdaskanalena, maje na mecie baraćbu mienavita z padobnymi pahrozami i zaklikami. U našych dziaržaŭnych strukturaŭ ciapier jość vydatnaja mahčymaść prademanstravać, što novyja zakanadaŭčyja normy pra supraćdziejańnie ekstremizmu nasamreč buduć vykarystoŭvacca ŭ adpaviednaści z zadekłaravanymi metami abarony nacyjanalnaj biaśpieki i terytaryjalnaj cełasnaści Biełarusi. My źviartajem uvahu prakuratury nie tolki na sam źmiest zajavy, ale i na toje, što jana była zroblena kiraŭnikom arhanizacyi, jakaja aktyŭna i dziejsna padtrymlivała sieparatyzm va Ukrainie, a ciapier stvaryła niekalki adździaleńniaŭ u Biełarusi (jość jak zarehistravanyja arhanizacyi, tak i niezarehistravanyja filijały)».

Janukievič taksama padkreśliŭ, što zajavy Załdastanava «mohuć być śviedčańniem stvareńnia ideałahičnaha padmurku dla padrychtoŭki hibrydnaj vajny suprać Biełarusi».

Nahadajem, matacyklisty kłuba «Načnyja vaŭki» ździajśniajuć motaprabieh «Darohi Pieramohi — na Bierlin». U minułyja vychadnyja niekalki ź ich nie zmahli pierasiačy biełaruska-polskuju miažu. Jak zajaviŭ na bryfinhu pres-sakratar miascovaha adździaleńnia pamiežachovy ŭ Ciarespali Daryjuš Sianicki, było admoŭlena va ŭjeździe siami matacyklistam. «Pryčyna admovy — pahroza dla hramadskaha paradku i biaśpieki dziaržavy», — paviedamiŭ pres-sakratar. Adnak častka ŭdzielnikaŭ motaprabiehu trapili ŭ Jeŭropu, niahledziačy na zabaronu Polščy. Pra heta paviedamiŭ 2 maja kiraŭnik prabiehu Andrej Babroŭski.

• 0
• 0
• 0
• 0
• 0
• 0
• 0
• 0