Kazulin: Łukašenka panična baicca kaardynacyi dziejańniaŭ miž EZ i ZŠA

Aŭstryjskaje vydańnie «Der Standard» źmiaściła siońnia interviju z palitykam Alaksandram Kazulinym, jaki adbyvaje turemnaje pakarańnie ŭ kalonii «Vićba‑3». Pytańni hazety byli pieradadzienyja palitviaźniu praź jaho dačok u časie niadaŭniaha naviedavańnia imi baćki.

«Der Standard»: Jakija Vašy žyćciovyja ŭmovy ŭ turmie?

Kazulin: Dzie b ja ni byŭ, ja adčuvaju siabie volnym čałaviekam. Šmat ludziej, jakija znachodziacca na voli, nasamreč, uvohule nie svabodnyja. Ja kažu pra duchoŭny pałon.

Umovy ŭ turmie narmalnyja dla karnaj systemy Biełarusi. Kali b siudy trapili ludzi z Zachadu, jany b byli šakavanyja ŭsim.

«Der Standard»: Čamu Vy nie pryniali prapanovy pajechać u Niamieččynu z tym, kab tam zmahli lekavać vašu žonku? U pryncypie heta byŭ dakładny dazvoł pakinuć Vašu radzimu, kab prasić prytułku za miažoj?

Kazulin: Biełaruskaje kiraŭnictva sprabavała zrabić manetaj abmienu samaje śviatoje, a mienavita — zdaroŭje majoj lubimaj žančyny dy dabro majoj siamji. Ni ja, ni maja siamja nie mahli tak nizka apuścicca. Bolš taho, lekavańnie ŭ Niamieččynie nie dapamahło b majoj žančynie, što, narešcie, i dakazała jaje chutkaja śmierć. Kali b ja chacieŭ źbiehčy, kab nia trapić u turmu, ja daŭno b heta zrabiŭ, bo byŭ papiaredžany pra svoj aryšt. Adnak ja źjaŭlajusia synam majho narodu i budu iści razam z maim narodam šlacham svabody, jakim by ciažkim hety šlach ni byŭ.

«Der Standard»: Čamu prezydent Łukašenka paśla niaŭdałaj revalucyjnaj sproby tak złujecca mienavita na Vas? Bo jość inšyja lidery apazycyi…

Kazulin: Łukašenka moža złavacca tolki na tych, ad kaho sychodzić sapraŭdnaja niebiaśpieka dla jaho. Jon vielmi dobra viedaje, na što ja zdolny. Jon vielmi dobra viedaje, što nikoli nia vytrymaje ŭ adkrytaj kanfrantacyi sa mnoj.

«Der Standard»: Čamu Łukašenka trymajecca i nadalej va ŭładzie, chacia Maskva jaho vidavočna bolej nie padtrymlivaje?

Kazulin: Na žal, niepasrednaja dapamoha Maskvy Miensku nikoli nie spyniałasia. 1,5 miljarda kredytu, a taksama hazavyja košty, značna nižejšyja za eŭrapiejskija, dakazvajuć heta.

Intaresy rasiejskaha biznesu ŭ Biełarusi —heta tolki viaršynia ajsberhu. Akramia taho, jość eŭrapiejcy, jakija sa svaim prahmatyzmam padtrymlivajuć režym Łukašenki.

«Der Standard»: Moža, sapraŭdy žyćcio pry Łukašenku nie takoje ŭžo i kiepskaje? U Rasiei dy va Ŭkrainie raspaŭsiudžanaje mierkavańnie, što Biełaruś — heta apošniaja vyspa sacyjalistyčnaha dabrabytu…

Kazulin: Žyćcio ŭ Biełarusi značna horšaje čym u Rasiei ci va Ŭkrainie — u pryvatnaści, što tyčycca pravoŭ čałavieka i viaršenstva zakonu. Ciapier naša kiraŭnictva zaniataje tym, kab ažyćciaŭlać hienacyd suprać ułasnaha narodu. U nas navat apošnim časam možna pačuć takuju prymaŭku: «Kali chočaš trapić za kraty, jedź u Biełaruś. Kali chočaš trapić za kraty chutka, jedź u Miensk».

Tak, Biełaruś — heta adzinaja vyspa ščaścia, adnak, kali hladzieć dziaržaŭnaje telebačańnie i čytać dziaržaŭnuju presu. U sapraŭdnaści, Biełaruś — heta apošni zapaviednik zatchłaj minuŭščyny ŭ strakataj prapahandysckaj upakoŭcy.

«Der Standard»: Što prapanuje apazycyja ŭ jakaści alternatyvy Łukašenku?

Kazulin: Samaśviadomaść našaha narodu stanovicca bolš śpiełaj. Łukašenka byŭ dadzieny nam dziela taho, kab my adčuli praryŭ u našaj śviadomaści.

Apazycyja vielmi chutka pierarobić sabie. Tut jość šmat pieradumovaŭ. Adrozna ad režymu, my prapanujem našym suajčyńnikam nie kanservacyju minułaha, a chutki, rašučy skačok u budučyniu.

«Der Standard»: Ci adčuvajecie Vy i Vašy siabry pa spravie padtrymku z boku Zachadu?

Kazulin: Zachad musić narešcie zrazumieć, što Łukašenka ŭjaŭlaje saboj vyklik usioj eŭrapiejskaj cyvilizacyi. Eŭropa pavinna heta adnojčy ŭśviadomić i pierastać zaihryvać z Łukašenkam.

ZŠA chutčej zrazumieli sutnaść Łukašenki. Tolki z pazycyi siły možna razmaŭlać z Łukašenkam, inakš jon abviadzie ŭsich vakoł palca.

Maja kryminalnaja sprava, narešcie, była pieradadzienaja dla razhladu ŭ Radu Eŭropy. Prezydent PARE spadar van der Linden paabiacaŭ, što praviadzie niezaležnuju ekspertyzu. Ad listapadu 2007 my nie atrymali anijakaha adkazu.

«Der Standard»: Što mohuć zrabić usiaśvietnyja demakratyi dziela taho, kab padtrymać praces demakratyzacyi ŭ Vašaj krainie?

Kazulin: Łukašenka panična baicca kaardynacyi dziejańniaŭ pamiž EZ i ZŠA. Uviadzieńnie ekanamičnych sankcyjaŭ całkam by paralizavała režym Łukašenki. Prezydent sam patłumačyŭ, što Eŭropa nie ŭviadzie anijakich ekanamičnych sankcyjaŭ suprać Biełarusi, bo kančatkova usio ž pieramahaje prahmatyzm. Adnak eŭrapiejcy pavinny sami prademanstravać, što jość rečy bolš važnyja za ekanomiku. I na hetym trymajecca čałaviectva. Heta fundamentalnyja kaštoŭnaści, jakija nichto nia maje prava čapać: maral, čałaviečnaść, spačuvańnie i miłasernaść.

Radyjo Svaboda

• 0
• 0
• 0
• 0
• 0
• 0
• 0
• 0