Kulinarnych knih z kožnym hodam stanovicca ŭsio bolš i bolš. Ekzatyčnyja stravy, mudrahielistyja recepty, niezvyčajnyja dla našaha kraju pradukty… Tak, heta, biezumoŭna, raznastaić naš stoł. Ale ŭ pahoni za modaj my zabyvajemsia, z čaho ŭsio pačynałasia. A kali zazirnuć u historyju našaj rodnaj kuchni, to ŭbačyš sapraŭdy nievierahodnyja rečy.
U hetym nam dapamahaje novaja kniha — «Litvinskaja kuchnia. Bajki Kuchmistra Vieraščaki», stvoranaja historykam Alesiem Biełym. Aŭtar adkryvaje dla čytačoŭ vielizarny płast siensacyjnych źviestak pra viadomyja-zabytyja-nieviadomyja stravy ź ziamiel kolišniaha Vialikaha Kniastva Litoŭskaha, heta značyć — z našych biełaruskich ziamiel.
Pahladzicie, jak pačynaje svoj apovied pan Vieraščaka: «A viedajecie, panovie, jak daŭniej jeli i pili ŭ dobrych šlachieckich damach staroj Litvy? Nu, naprykład, pry kancy 1820-ch hadoŭ, u załatyja bieskłapotnyja časy, dzie-niebudź u Navahradskim abo Słonimskim paviecie?» I sapraŭdy, ci dobra vy viedajecie, jak hatavali zrazy ŭ radziviłaŭskich majontkach? Ci što možna zrabić sa zvyčajnaha baćvińnia? A historyja chaładnika napisana tak smačna, što tak i chočacca biehčy na kuchniu haspadaryć…
«Kniha składzienaja z bajek, napisanych Kuchmistram Vieraščakam dla «Našaj Nivy» i «Źviazdy» ciaham apošniaha dziesiacihodździa.
Blizkaje znajomstva z «Kucharkaj Litoŭskaj», kulinarnymi realijami paemy «Pan Tadevuš», miemuarami Leona Patockaha, Jana Bułhaka, Mielchijora Vańkoviča, Michała Paŭlikoŭskaha i mnohimi inšymi tekstami XIX — pieršaj pałovy XX st. stvaraje dosyć arhaničnuju karcinu kuchni, jakuju siońnia ŭsio čaściej nazyvajuć «litvinskaj». Heta šlachieckaja i miaščanskaja kuchnia byłoha VKŁ, u niejkaj stupieni taksama zamožnaha sialanstva», — kaža aŭtar.
«Litvinskaja kuchnia» vychodzić ekskluziŭna ŭ elektronnym vyhladzie.
Niahledziačy na heta, u joj šmat ilustracyj, jakija dapamohuć vam lepiej zrazumieć tekst. Na luboj vašaj elektronnaj pryładzie zaŭsiody budzie pad rukoj lubimy recept, vy lohka i paŭsiul zmožacie pahladzieć u śpis inhredyjentaŭ, jakija vam spatrebiacca, kab pryhatavać šykoŭnyja stravy i ździvić svaim umielstvam blizkich i znajomych.
Darečy, jašče da vychadu kniha narabiła šmat šumu ŭ sacyjalnych sietkach i vyklikała niepadrobnuju cikavaść. Jaje abmiarkoŭvajuć, čakajuć i ŭžo rychtujuć načyńnie na kuchni… Paviercie, da jaje ŭžo ciapier niama abyjakavych.
Takim čynam, trymajcie sapraŭdnuju «Litvinskuju kuchniu» ad słavutaha pana Kuchmistra Vieraščaki.
Spampavać knihu možna na sajcie kniharnia.by/.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary