«Pierśpiektyva» choča pravieści 3 kastryčnika ŭ Minsku čarhovy forum pradprymalnikaŭ

Respublikanskaje hramadskaje abjadnańnie «Pierśpiektyva» maje namier pravieści čarhovy forum pradprymalnikaŭ 3 kastryčnika ŭ staličnym Domie Maskvy, paviedamiŭ staršynia arhanizacyi Anatol Šumčanka.

Forum budzie pryśviečany pierśpiektyvie pracy pradstaŭnikoŭ małoha biźniesu va ŭmovach, što skłalisia ŭ Biełarusi, a taksama padviadzieńniu pramiežkavych vynikaŭ pracy indyvidualnych pradprymalnikaŭ ŭ 2016 hodzie.

«Treba sabracca, kab dać acenku dziejańniam ułady ŭ śfiery małoha biźniesu. I ja zahadzia chaču skazać, što pradprymalniki ŭ takim nastroi, što hetyja acenki dla ŭłady nie buduć pachvalnymi», — zaznačyŭ Šumčanka.

Jašče adnoj pryčynaj, z-za jakoj treba pravieści hetaje mierapryjemstva, lidar «Pierśpiektyvy» nazvaŭ nieabchodnaść dać pradprymalnikam spakojna praciahvać pracu. Jon nahadaŭ, što papiaredni forum adbyŭsia ŭ siaredzinie červienia, i paśla jaho ŭ pradprymalnikaŭ było niekalki miesiacaŭ, na praciahu jakich jany adnosna spakojna pracavali, biez pravierak z boku kantrolna-nahladnych orhanaŭ.

Pieryjad hetaj cišyni parušyli pradstaŭniki padatkovych orhanaŭ, jakija zładzili 6 vieraśnia pravierku supravadžalnych dakumientaŭ u IP, što handlujuć tavarami lohkaj pramysłovaści na Paŭdniovym rynku ŭ Hrodnie. U adkaz na pravierku IP zakryli svaje handlovyja punkty i nie pracavali da kanca dnia.

«Situacyja ŭ Hrodnie moža stać druhim Połackam, dzie taksama byli pravierki i ź jakoha ŭ kancy minułaha hoda pačalisia pratesty pradprymalnikaŭ. Tamu treba pravodzić novy forum, kab dać ludziam pracavać dalej», — rastłumačyŭ Šumčanka.

Aprača inšaha na budučaj sustrečy pradprymalniki znoŭ uźnimuć pytańnie ab viartańni da patentnaj sistemy viadzieńnia małoha biźniesu.

Nahadajem, z pačatku hetaha hoda dziejničaje ŭkaz prezidenta № 222 ab pradprymalnickaj dziejnaści. Z-za jaho patrabavańniaŭ pieršyja niekalki miesiacaŭ hoda była faktyčna paralizavanaja praca IP, što handlujuć pradukcyjaj lohkaj pramysłovaści, bo ciapier jany mohuć handlavać tolki tymi tavarami, uviezienymi z krain Mytnaha sajuza, na jakija ŭ ich jość supravadžalnyja dakumienty. Atrymańnie takich dakumientaŭ vielmi składanaje ŭ suviazi z pazicyjaj rasijskich partnioraŭ. Sproby IP znajści parazumieńnie va ŭładaŭ byli biezvynikovymi, i da kanca sakavika bolšaść pradprymalnikaŭ vymušanyja byli adnavić pracu, niahledziačy na ryzyku być aštrafavanymi i pazbaŭlenymi tavaru.

Apošni raz hetaja prablema abmiarkoŭvałasia 13 červienia na arhanizavanym «Pierśpiektyvaj» forumu pradprymalnikaŭ. Tady Šumčanka zajaŭlaŭ, što adnaŭleńnie pravierak z boku kantrolna-nahladnych orhanaŭ spravakuje novuju chvalu pratestnych vystupaŭ IP. «Toje, što ciapier ludzi maŭčać pavodle ŭkaza № 222, heta nie značyć, što jany ź im źmirylisia. Jak tolki pačnucca pravierki pa nakładnych, adrazu ž zahučać masavyja zajavy i patrabavańni ab admienie hetaha ŭkaza. Pryčym hetyja zajavy buduć padmacavanyja peŭnymi dziejańniami samich pradprymalnikaŭ», — prahnazavaŭ lidar «Pierśpiektyvy».

• 0
• 0
• 0
• 0
• 0
• 0
• 0
• 0