U Minskim haradskim sudzie doŭžacca sprečki pa «spravie siamnaccaci», hałoŭnym fihurantam jakoj źjaŭlajecca 31-hadovy minčanin Kanstancin Viluha. Mienavita jon, pavodle viersii śledstva, arhanizavaŭ mižnarodnuju złačynnuju hrupu pa prodažy narkotykaŭ u Biełarusi i Rasii. Anłajn-krama nazyvałasia LegalMinsk. Prakuror Aleh Bujlankoŭ začytaŭ, što było znojdzienaje pry pieratrusie kvatery Viluhi, paviedamlaje BiełaPAN.
Kanstancin Viluha byŭ zatrymany 4 listapada 2014 hoda. Z taho času znachodzicca pad vartaj. Pry zatrymańni pahražaŭ padklučyć upłyvovych znajomych. «U jaho i miljony dołaraŭ byli, i suviazi, — adznačaŭ u intervju BiełaPAN načalnik HUBAZiK MUS Mikałaj Karpiankoŭ. — My nie možam skazać, jak jon uździejničaŭ, ale heta byŭ taki vialiki nacisk, što situacyja dajšła da kiraŭnika dziaržavy».
U dzień zatrymańnia prajšoŭ pieratrus u kvatery hałoŭnaha fihuranta. Jak adznačyŭ dziaržabvinavaŭca, apieratyŭniki vyjavili dziasiatki sim-kart i płastykavych kartak, a taksama čamadan, u jakim lažali hrošy — 125 tys. rasijskich rubloŭ i 58 tys. dołaraŭ.
Akramia taho, u kvatery była mašynka dla padliku banknot, try radyjostancyi, dyski, na jakich zachavalisia zapisy skajp-kanfierencyj ź inšymi ŭdzielnikami narkatyčnaha rynku Biełarusi, u pryvatnaści pradstaŭnikami kramy «Kosmas». Ich nazyvajuć asnoŭnymi kankurentami Viluhi. Razmovy, jak adznačyŭ prakuror Bujlankoŭ, tyčylisia padziełu rynku pa prodažy spajsaŭ, a taksama aptovych i roźničnych cen na kurylnyja sumiesi i psichatropy.
U kvatery Viluhi była vyjaŭlenaja kopija administracyjnaj spravy ŭ dačynieńni da Aliny Cierahiery, jakaja taksama prachodzić abvinavačanaj pa «spravie siamnaccaci». Zhodna ź viersijaj śledstva, jana ŭznačalvała «biźnies» Viluhi ŭ Minsku.
U sudzie prahučała, što Cierahieru nieadnarazova zatrymlivali za prodaž spajsaŭ, ale adpuskali na svabodu, bo vyjaŭlenyja ŭ jaje sumiesi byli na toj momant lehalnymi.
Letam 2014 hoda ŭ jaje ŭ kvatery była znojdzienaja bujnaja partyja zabaronienych rečyvaŭ. Z taho času dziaŭčyna znachodzicca pad vartaj.
Viluha, jak i bolšaść padsudnych, svaju vinu nie pryznaje. Jany jašče vystupiać z apošnim słovam.
Pakul dziaržabvinavaŭca praciahvaje svoj vystup u sprečkach. Jaho pramova zajmaje pryblizna 200 staronak.
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club10
Kamientary