Samy modny ministr: Kałtovič vykłaŭ sełfi z rabočaha kabinieta FOTAFAKT
Na žal, biełaruskija čynoŭniki vyšejšaha ranhu ŭsio jašče «na vy» z sacyjalnymi sietkami. Ministry i deputaty krain Zachadu cudoŭna razumiejuć, kab mieć papularnaść i kantakt ź ludźmi prysutnaść u sacyjalnych sietkach prosta nieabchodnaja. Tamu jany aktyŭna viaduć tvitary, fejsbuki i snepčaty. Siaredniestatystyčny biełaruski čynoŭnik maksimum maje staronku ŭ «Adnakłaśnikach» z paraj dziasiatkaŭ siabroŭ.
Adnak źjaŭlajucca i tyja, chto ličyć, što być u sacsietkach ich abaviazak. Namieśnik ministra sportu i turyzmu Michaił Partnoj niamała času pravodzić u fejsbuku, pamočnik prezidenta pa pytańniach sportu Maksim Ryžankoŭ piša ŭ tvitar, u staršyni Hrodzienskaha rajvykankama Miečysłava Hoja jość staronka Ukantakcie.
Siarod astatnich varta asabliva adznačyć ministra antymanapolnaha rehulavańnia i handlu Uładzimira Kałtoviča. Asabliva raduje, što hety čynoŭnik piša ŭ sacsietkach nie tolki pracoŭnyja momanty, ale i dzielicca asabistymi nazirańniami.
Zusim niadaŭna Kałtovič vykłaŭ sełfi z pracoŭnaha kabinieta. «Niadziela, na pracy», — padpisaŭ zdymak ministr. Na fota jon u niefarmalnaj abstanoŭcy, biez halštuka i ŭ modnych akularach.
Pryčym heta nie pieršaje sełfi ad spadara Kałtoviča, niejak jon užo źmiaščaŭ zdymak z rodnaha Červienia. Źmiaščaŭ taksama fota ź viasiella dački.
Uładzimir Kałtovič naradziŭsia 1 kastryčnika 1966 u Červieni. Skončyŭ BDEU (1992) i Akademiju kiravańnia pry prezidencie (2001). Jon pracavaŭ namieśnikam hienieralnaha dyrektara ŭ bujnych minskich kramach: univiermahu «Biełaruś» i handlovym domie «Na Niamizie». Byŭ namieśnikam kiraŭnika Zavodskaha rajona Minska. Uznačalvaŭ minskuju haradskuju fiederacyju handboła. Da pryznačeńnia ŭ ministerstva Kałtovič pracavaŭ daradcam-pasłańnikam u pasolstvie Biełarusi ŭ Maskvie.
Uładzimir Kałtovič svajoj aktyŭnaściu ŭ fejsbuku daje cudoŭny prykład inšym ministram.
Ciapier čytajuć
U Minsku kampaniju z 18 čałaviek zatrymali na pikniku ŭ parku4
Kamientary