«Jarkaje adzieńnie — heta adkaz na zakrytaść hramadstva». Biełaruskija łality — chto jany i čym žyvuć?
Jany nosiać pyšnyja sukienki, trochvuhołki, chavajuć plečy pad balero, a pad tufielki padbirajuć vytančanyja karunkavyja škarpetki i pančochi. Ich možna sustreć u kaviarniach, teatrach, va ŭniviersitetach i prosta ŭ horadzie. Panienki, jakija nibyta ź inšaha stahodździa, adrazu pryciahvajuć uvahu minakoŭ. Chto jany? Dziaŭčaty nazyvajuć siabie biełaruskimi łalitami i pradstaŭlajuć mižnarodny subkulturny ruch Gothic&Lolita fashion.
Vy čytajecie hety materyjał dziakujučy atelje pa pašyvie i ramoncie adzieńnia Girto.
Styl «łalita» źjaviŭsia ŭ 1980-ja ŭ Japonii. Jon uvabraŭ u siabie rysy moładzievaj vuličnaj mody, dziciačaj viktaryjanskaj, a taksama epochi rakako. Jarki źniešni vyhlad maładych japoncaŭ i japonak byŭ svojeasablivym pratestam suprać zakrytaści i kansiervatyŭnaści hramadstva.
Asablivuju papularnaść styl nabyŭ paśla taho, jak u 2004 hodzie źniali film «Dziaŭčaty-kamikadze» (tam jaho ŭvasablała hałoŭnaja hierainia). Paśla vychadu stužki ŭ masavy prakat łality pačali źjaŭlacca pa ŭsim śviecie. Chutka jany źjavilisia i ŭ Biełarusi, abjadnaŭšysia na fiestyvali ŭschodnieazijackaj kultury ŭ 2009 hodzie.
Siońnia ŭ supolnaść biełaruskich łalit uvachodzić kala 25 čałaviek z roznych haradoŭ: Minska, Barysava, Harodni, Homiela, Bresta. Dla hetych dziaŭčat, mnohija ź jakich stali siabroŭkami, zachapleńnie modaj pierarasło ŭ štości kudy bolšaje.
My trapili na adnu z tradycyjnych sustreč biełaruskich łalit i raspytali niekatorych hieraiń, što daje im heta zachapleńnie, kolki hrošaj jany vydatkoŭvajuć na svaje vobrazy i jak na ich zvyčajna reahujuć minaki.
Maryna Davydava, supracoŭnica Mytnaha kamiteta:
«U Biełarusi ja pryjšła da hetaha stylu adnoj ź pieršych. U 2009 hodzie ŭbačyła na fiestyvali «Chihan» padobnyja vobrazy, i jany mnie pryjšlisia pa dušy. Ja stała šmat čytać pra łalit i sama ŭciahnułasia ŭ ruch. Siońnia kaardynuju defile ŭ hetym styli na fiestyvalach «Chihan» i «Vebkon».
U asnoŭnym my nabyvajem rečy ŭ japonskich i kitajskich internet-kramach, šmat robim sami. Sumačka, naprykład, — maich ruk sprava. Trochvuhołku šyli siabry z Maskvy: ja śpiecyjalna dasyłała im stužku ad sukienki, kab dakładna padabrać koler. Za kałhotkami ja haniałasia vielmi doŭha, ale, narešcie, nabyła. Być łalitaj — heta być kalekcyjanierkaj. U internecie dobra raźvity druhasny rynak, tamu pry žadańni jość mahčymaść nabyć unikalnyja rečy pa dobrym košcie (u siarednim tolki adna jakasnaja sukienka moža kaštavać 200 dalaraŭ)».
Viera Čarniaŭskaja, budučaja mieniedžarka-ekanamistka:
«Hetuju sukienku mnie na Novy hod prezientavaŭ muž. My ź im i paznajomilisia na fiestyvali japonskaj kultury: jon tady cikaviŭsia kaspłejem. Holfy — japonskaha brenda, tufli — kitajskija, kalje i ŭpryhožvańnie na hałavu ja rabiła sama.
U styli hadoŭ siem. Kali tolki pačynała, baćki nie razumieli, navošta mnie heta ŭsio. Ciapier ža navat mohuć dapamahčy z nabyćciom niekatorych rečaŭ. Ja spakojna mahu vyjści tak pahulać, schadzić u kino — heta prosta adzieńnie, u jakim ja adčuvaju siabie kamfortna i pryhoža».
Alaksandra Hušča, techničnaja piśmieńnica ŭ «Jepam»:
«Ja pracuju z doma, tamu majo zvykłaje adzieńnie — heta pižama ci łasiny. Ale ŭ miežach stylu ja mahu vydzielić čas na siabie, stvaryć zakončany vobraz i pajści tak hulać, na poštu ci ŭ kramu. Pry hetym budu adčuvać siabie cudoŭna, bo heta moj dzień.
Mnohija, i ja ŭ tym liku, źviazvajuć hety styl z peŭnaj žyćciovaj pazicyjaj: u 1980-1990-ja hady žančyny stali abirać jaho, kab pakazać, što jany suprać patryjarchalnaha ładu. Mužčyny mierkavali, što žančyny zaŭsiody buduć pasłuchmianymi. Što z-pad apieki baćki buduć adrazu pierachodzić pad apieku muža. Ale žančyny vystupili suprać: lepš budu hulać pa horadzie z karunkavym parasonam, čym zajmacca abaviazkami, jakija mnie naviazali. Heta cudoŭnaje imknieńnie žančyn vyrašać za siabie.
Zvyčajna fieministyčna nastrojenyja žančyny asacyjujucca z maskulinnym vobrazam: karotkaja stryžka, za styrnom mašyny, palić… Ale styl łality pakazvaje, što možna być mocnaj, niezaležnaj, žyć dla siabie, ale pry hetym vyhladać hipieržanocka.
Siońnia ŭ majoj kalekcyi bolš za 30 sukienak. Ja niadaŭna dałučyłasia da dziaŭčat i pakul krychu fanatyčna reahuju na pryhožyja rečy. Ale žyćcio, jak kažuć, zanadta karotkaje, kab nasić sumnaje adzieńnie.
Zdarajecca, što nas sprabujuć sfatahrafavać ciškom, hučna abmiarkoŭvajuć. Heta nie vielmi pryjemnaja častka žyćcia ź jarkaj źniešnaściu, ale prychodzicca mirycca».
Čytajcie taksama:
Saša: žyćcio paśla pažaru. FOTAHISTORYJA Siarhieja Hudzilina pra niejmaviernaje žadańnie žyć
Iryna Michałap, bijołah:
«U našym hramadstvie čamuści pryniata, što pryhoža treba vyhladać tolki na niejkija śviaty: dzień naradžeńnia, Novy hod ci karparatyŭ. Chočacca, kab pryhožaha ŭ našym žyćci było bolš, tamu ja ŭ takim vobrazie naviedvaju i halerei, i teatr, i roznyja imprezy.
U supolnaści znachodziacca kłasnyja ludzi, tamu łality — heta nie tolki pra źniešnaść. Kali ž raskazvać pra moj vobraz, to sukienka, naprykład, z sajta Taobao: ja prosta zakachałasia ŭ prynt z alaniatami. Bolšuju častku zakołak i manžety rabiła sama».
Kacia Astrašab, ramieśnica:
«Łalitnyja vobrazy dla mianie — paradnaje adzieńnie. Usio ž rečy kaštujuć niamała, škada ich chutka sapsavać.
Na mnie kłasičny vobraz, ale ŭ miežach Gothic Lolita isnujuć i inšyja styli: kłasičny, hatyčny, sałodki, ołdskuł i odzi (ad słova «prync», chłapčukovy styl, u jakim mohuć apranacca i dziaŭčaty). Ja lublu ekśpierymientavać, tamu da hetaj sukienki z sekand-chendu dadała nietypovuju detal — partupieju».
Ryna Bakunava, trenierka pa płavańni:
«Ja vielmi daŭno puskała ślinki pa atmaśfiery łalitnych vobrazaŭ, ale nijak nie mahła znajści biełaruskich łalit, kab da ich dałučycca. Ale niedzie paŭhoda tamu my znajšlisia i paznajomilisia.
U hetym vobrazie ja sprabavała ŭvasobić łalitu-pryncesu: sarafan, aksesuary, škarpetki i karonu rabiła sama, tufli ŭpryhožyła bisieram. Ja chadžu tak navat va ŭniviersitet. Niekatoryja ličać, što ja naradziłasia nie ŭ svoj čas, ale mianie natchniaje takaja estetyka».
Apytanka
Nastaśsia Hrakava, studentka-dyzajnierka:
«Sukienku ja nabyła na akcyi ŭsiaho za 25 dalaraŭ — i heta sapraŭdnaje ščaście. Viedajecie, ja atrymlivaju zadavalnieńnie, kali nadziavaju jaje: hladžu ŭ lusterka i padabajusia sabie. Usio ž štodzionny nabor sa švedra i džynsaŭ vielmi chutka nadakučvaje.
Kali ja zajmałasia kaspłejem i nasiła kalarovyja linzy dy farbavała vusny ŭ čorny, to baćkam i babuli heta nie padabałasia. Zatoje ŭ ciapierašnim vobrazie jany ličać mianie vielmi pryvabnaj».
Takoje samaje adzieńnie, i ŭvohule luboje inšaje z vašych mar vy možacie zamović u atelje Girto:
UNP 192432477
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam11
Kamientary