Jak minskija ŭłady łoviać parušalnikaŭ kala vadajomaŭ z dapamohaj dronaŭ
Načalnik adździeła apieratyŭnaha kantrolu Minharkampryrody Dźmitryj Aleksandrovič, pryparkavaŭšy słužbovy transpart na śpiecyjalna adviedzienaj placoŭcy, zapuskaje ŭ nieba kvadrakoptar.
— Dron źjaviŭsia ŭ kamitecie nie tak daŭno, — tłumačyć ekołah. — I my ŭskładajem na jaho vialikija nadziei, tamu što z dapamohaj takoj pryłady možna vielmi chutka vyvučyć abstanoŭku na toj terytoryi, dzie pravodzicca rejd. Kvadrakoptar zusim nie pieraškadžaje tym, chto adpačyvaje, i zdolny prakraścisia tudy, dzie prablematyčna prajechać na transparcie abo prajści pieššu. Akramia taho, jon ekanomić nam paliva i dapamahaje źnizić vykidy zabrudžvalnych rečyvaŭ u atmaśfieru.
Vintakryłyja mašyna z paciešnym hudzieńniem padymajecca ŭ pavietra. Chvilina-druhaja — i jana rastvarajecca ŭ niebie. A na ekranie manitora, jaki trymaje ŭ rukach načalnik adździeła, prapłyvajuć simpatyčnyja krajavidy.
U prybiarežnaj pałasie kala vadaschovišča zvyčajna pakidajuć svoj transpart amatary rybałki. Na hety raz udzielniki rejdu vyjaŭlajuć adrazu niekalki parušalnikaŭ.
— Vy ŭ kursie, što parkavacca bližej čym za 30 mietraŭ ad zrezu vady zabaroniena? — cikavicca ŭ adnaho z takich kiroŭcaŭ Dźmitryj Aleksandrovič.
— Pieršy raz čuju, — kaža parušalnik.
Adnak nie spračajecca i moŭčki padpisvaje pastanovu ab administracyjnym spahnańni. Štraf u dadzienym vypadku składaje 12,25 rubla.
— Apłacicie ŭ banku i pryniesiacie kvitancyju ŭ Minharkampryrody na Plachanava, 18, — tłumačyć paradak dziejańniaŭ ekołah. — A zaraz pierastaŭcie, kali łaska, vaš transpart na parkoŭku pablizu.
Uładalnik biełaha «Piežo» i tut nie spračajecca.
A voś haspadar «Aŭdzi», adahnaŭšy svaju mašynu dalej ad vady, admaŭlajecca pradjavić vadzicielskija dakumienty.
— Vy ž nie DAI, — piarečyć mužčyna.
Udzielniki rejdu taksama nie spračajucca.
— Kali kiroŭca nie zhodny z pretenzijami ci nie hatovy pradjavić dakumienty, składajecca nie pastanova, a pratakoł. U nas jość fota, na jakim zafiksavana parušeńnie. Štraf u takoj situacyi budzie značna vyšejšy, — kaža Dźmitryj Aleksandrovič.
Kamientary