Dyrektar Rashvardyi Viktar Zołataŭ vyklikaŭ apazicyjaniera Alaksieja Navalnaha na duel, paabiacaŭšy pieratvaryć jaho ŭ «adbiŭnuju», u adkaz na apublikavanaje Fondam baraćby z karupcyjaj (FBK) rasśledavańnie, pryśviečanaje parušeńniam u viedamstvie. Rolik sa zvarotam dastupny na aficyjnym YouTube-kanale Rashvardyi.
«U dačynieńni da mianie vy dapuścili abraźlivyja, paklopnickija razvažańni, u aficerskim asiarodździ nie pryniata prosta tak daravać. Spakon vieku padluhu bili pa tvary, vyklikali na duel. Spadar Navalny, nam ža nichto nie pieraškadžaje viarnuć choć by častku hetych tradycyj, ja maju na ŭvazie satysfakcyju», — zajaviŭ Zołataŭ.
«Ja prosta vyklikajuć vas na pajadynak — na rynh, tatami, kudy zaŭhodna, dzie abiacaju zrabić z vas dobruju, sakavituju adbiŭnuju», — dadaŭ hienierał.
Jon taksama adznačyŭ, što viedamstva sumiesna z orhanami kontrvyviedki, vajennaj prakuraturaj i Padlikovaj pałataj aktyŭna pracuje nad vyjaŭleńniem svaich «karupcyjnych niedachopaŭ». «My zmahajemsia z hetym, vyjaŭlajem hetych ludziej i, u zaležnaści ad zroblenaha, albo zvalniajem ich, albo addajom pad sud — voś tak u nas iduć spravy», — padkreśliŭ Zołataŭ.
U 1990-ja hady Zołataŭ byŭ naniaty ciełaachoŭnikam mera Sankt-Pieciarburha Anatola Sabčaka. Na hetaj pracy paznajomiŭsia z Uładzimiram Pucinym, jaki ŭ toj čas znachodziŭsia na pasadzie namieśnika mera. Paśla zbliziŭsia z Pucinym, staŭ brać udzieł u sparynhach pa boksie i dziudo.
Z 2000 h. pa 2013 h. Zołataŭ byŭ načalnikam Słužby biaśpieki prezidenta Rasii.
U kancy žniŭnia Navalny vypuściŭ rasśledavańnie, u jakim raspavioŭ, što u 2018 hodzie ceny na adny i tyja ž pradukty, što zakuplajucca dla Rashvardyi, vyraśli ŭ niekalki razoŭ u paraŭnańni z 2017 hodam. Pavodle jaho dadzienych, heta adbyłosia paśla taho, jak u śniežni 2017-ha adzinym pastaŭščykom pa rasparadžeńni ŭrada staŭ krymski miasakambinat «Družba narodaŭ», jaki ŭ ciapierašni čas praz łancužok kampanij nibyta naležyć byłomu aficeru ŭnutranych vojskaŭ Barysu Kantemiravu, jaki zajmaŭ raniej pasadu načalnika Centralnaha archiva ŭnutranych vojskaŭ MUS.
Kamientary