«Dobraja maniuka»: pamočnica Džaan Roŭlinh patraciła 24 000 funtaŭ piśmieńnicy na svaje patreby

U Brytanii praciahvajecca sudovy praces suprać pamočnicy Džaan Roŭlinh Amandy Donaldsan, jakuju abvinavačvajuć u tym, što jana vydatkavała amal 24 000 funtaŭ piśmieńnicy na ŭłasnyja patreby, piša bbc.com.

35-hadovaja piersanalnaja asistentka za hrošy aŭtarki «Hary Potera» kuplała sabie darahuju kaśmietyku, kavu, katoŭ.

Donaldsan karystałasia kredytnaj kartaj piśmieńnicy, u pryvatnaści, jana nabyła kaśmietyku na sumu 3629 funtaŭ.

Sama Amanda Donaldsan, jakaja pracavała na piśmieńnicu ad 2014 da 2017 hoda, abvinavačvańni abviarhaje.

U sudzie muž piśmieńnicy Nił Miurej nazvaŭ asistentku «dobraj maniukaj».

Pavodle jaho słoŭ, spadaryniu Donaldsan uziali na pracu, kab jana dapamahała Džaan Roŭlinh u arhanizacyjnych pytańniach u biznesie i asabistym žyćci.

Piśmieńnica padała na svaju byłuju asistentku ŭ sud u pačatku listapada.

Jak zajaviŭ Nił Miurej, spadaryniu Donaldsan zvolnili ŭ 2017 hodzie pa padazreńni ŭ niepravamiernych vydatkach.

Pytańni ŭźnikli z-za źniaćcia najaŭnych na sumu 400 i 250 funtaŭ u śniežni 2016 hoda, jakija, jak śćviardžała spadarynia Donaldsan, pajšli na zadatak dla kaladnaha abiedu.

Buchhałtar raniej paviedamiŭ sudu, što źviazaŭsia z restaranam, i tyja paćvierdzili, što nie prasili pra zadatak i nie atrymlivali jaho.

Paśla hetaha spadar Miurej naŭprost spytaŭ u Donaldsan ab vydatkach.

«Amanda zaŭsiody padavałasia žvavaj, trochi bałbatlivaj i niadbałaj. Ale tady ja ŭbačyŭ zusim inšuju asobu», — raspavioŭ muž Roŭlinh.

«Jana zakryłasia ŭ sabie, zastavałasia spakojnaj i faktyčna ašukvała. U kancy sustrečy mianie ŭraziła, nakolki dobraj maniukaj jana vyjaviłasia», — uspaminaŭ spadar Miurej.

Muž piśmieńnicy raspavioŭ, što razam sa spadaryniaj Donaldsan u ofisie ŭ Edynburhu pracavali jašče šeść čałaviek.

Zrešty, takija vydatki jak nabyćcio kaśmietyki luks-brenda Molton Brown na sumu bolš jak 3,5 tysiačy funtaŭ nie ŭvachodzili ŭ aficyjny biudžet.

«Dumaju, bolšaść pakupak rabiła Amanda dla Amandy», — dadaŭ jon, adznačyŭšy, što kredytnuju kartku jana mieła vykarystoŭvać tolki dla dziełavych abo asabistych vydatkaŭ jaje kiraŭnicy.

Jon taksama ŭspomniŭ, jak daviedaŭsia, što jana prapanavała kaleham apłacić sumiesny abied, zajaviŭšy: «Nie chvalujciesia, Nił hetuju kartku nie praviaraje».

Amanda mieła raz na miesiac davać buchhałteryi spravazdaču pa vydatkach, razam z čekami.

Akramia kredytnaj karty, jana taksama mieła dostup da siejfa z valutaj. Adtul jana, zhodna z abvinavačvańniami biez dazvołu ŭziała sumu ŭ ekvivalencie bolš za 7000 funtaŭ sterlinhaŭ.

Nieadpaviednaści ŭ spravazdačach zaŭvažyli ŭ lutym minułaha hoda.

Džaan Roŭlinh abvinavačvaje asistentku ŭ nastupnych niepravamiernych vydatkach:

823 funty ŭ piakarni,

1482 funty na śviečki firmy Jo Malone,

3629 funtaŭ na kaśmietyku Molton Brown,

2139 funtaŭ na kancylarskija tavary ŭ kramie Paper Tiger,

1636 funtaŭ u kafe Starbucks.

Jana taksama nabyła sabie dźviuch parodzistych kotak za 1200 funtaŭ.

Jak śćviardžaje Džaan Roŭlinh, jaje asistentka taksama skrała niekalki darahich cacak, zroblenych pa matyvach tvoraŭ piśmieńnicy: madel Chohvartskaha ekspresa i niekalki kalekcyjnych naboraŭ.

• 0
• 0
• 0
• 0
• 0
• 0
• 0
• 0