Biełarusaŭ ź litoŭskim šenhienam departavali ź Bielhii. Jak pracuje praviła pieršaha ŭjezdu ŭ ES?
U niepryjemnaj situacyi apynulisia našy suajčyńniki, jakija lacieli ź Minska ŭ Brusel. Z adkrytaj litoŭskaj vizaj jany ździejśnili pieršy ŭjezd u Bielhiju, a nie ŭ Litvu. U vyniku ich departavali.
Stanisłaŭ Suvoraŭ: «My znachodzimsia ŭ pastarunku aeraporta Šarlerua. U nas adabrali ŭsie dakumienty i telefony. Tolki ŭ mianie telefon pakinuli, tamu što nie zaŭvažyli».
Kali pamiežniki zirnuli na pašpart, na vizy, to ŭ ich uźnikli niejkija pytańni.
Stanisłaŭ i try tavaryšy prybyli ŭ Bielhiju z zaprašeńniem.
Jon kaža, što ŭ ich było aficyjnaje zaprašeńnie ad futbolnaha kłuba «Bruhie», jakoje pamiežniki navat nie ŭziali ŭ ruki i addali nazad.
Zatym byli kanvoj, śpiecyjalny aŭtamabil dla zatrymanych, šlach u izalatar časovaha ŭtrymańnia, dzie razam ź nielehałami i niezakonnymi mihrantami z usiaho śvietu biełarusy ahułam praviaduć troje sutak.
«Parušeńnie vizavaha zakanadaŭstva šenhienskaj zony», — prykładna z takoj farmuloŭkaj suprać ich raspačnuć administracyjnuju spravu.
Stanisłaŭ Suvoraŭ: «Jany nam tam sprabavali rastłumačyć, što pieršy ŭjezd pavinien byŭ być u Litvu, a tolki potym — u Bielhiju. My tłumačyli, što ŭ Bielhii my na dva dni, a zatym palacim u Litvu na bolš doŭhi termin».
Sprečki na temu, ci pracuje praviła pieršaha ŭjezdu, nie ścichajuć, kolki isnuje šenhienskuju pahadnieńnie. Havorka idzie ab abaviazacielstvie pierasiakać pieršaj miažu toj krainy, pradstaŭniki jakoj uklejvali vizu ŭ biełaruski pašpart. Chtości śćviardžaje, što adkryvaŭ vizu ŭ polskim pasolstvie, a zajazdžaŭ u ES praź Litvu, źviartaŭsia ŭ ispanski vizavy centr i biez prablem adpraŭlaŭsia naŭprost na francuzskija kurorty. Historyj šmat, ale praviła ŭsio ž adno.
Adkryvajem piaty artykuł Vizavaha kodeksa Šenhienskaha pahadnieńnia. Kampietencyi dziaržaŭ, jakija vydajuć zapavietny šenhien, vyznačany ŭsiaho ŭ troch punktach. Vydavać vizy moža:
a) dziaržava, čyja terytoryja vystupaje adzinym miescam pryznačeńnia;
b) kali pajezdka ŭklučaje niekalki krain, — dziaržava, terytoryja jakoj vystupaje asnoŭnym miescam pryznačeńnia z punktu hledžańnia praciahłaści abo mety znachodžańnia;
c) kali asnoŭnaje miesca pryznačeńnia nie moža być vyznačana, — dziaržava, praź źniešniuju hranicu jakoj budzie adbyvacca ŭjezd na terytoryju šenhienskaj zony.
Biełarusy, atrymaŭšy vizy ŭ litoŭskim pasolstvie, naŭprost palacieli ŭ Bielhiju, a značyć, vizavy kodeks parušyli. Farmalna. Ale ž heta dziełavaja pajezdka, a na zvarotnym šlachu biełarusy źbiralisia ŭ Litvu. Mahli ž płany źmianicca za paru hadzin da vyjezdu? Što pra heta dumajuć u śpiecyjalnym upraŭleńni Jeŭrapiejskaj kamisii, jakaja rehuluje mihracyjnyja pracesy? Voś adkaz:
«My nie možam heta kamientavać. Vydača viz, a taksama admova va ŭjeździe źjaŭlajecca kampietencyjaj dziaržavy-siabra, tamu my prapanujem vam źviazacca niepasredna ź bielhijskimi/litoŭskimi ŭładami».
Vydača viz i kantrol za imi — heta ŭžo adkaznaść pamiežnikaŭ toj krainy, jakija praviarajuć dakumienty.
U vypadku z kamandziroŭkaj u Bruhie biełarusy paśla ŭmiašańnia konsuła padpisali papiery, dzie pahadzilisia z parušeńniem, i prosta ź izalatara źjechali nazad u aeraport na rejs u Minsk.
Kamientary