«Łavu Klintana» vyvieźli z Kurapat na restaŭracyju

9 lutaha aktyvisty KCHP-BNF, jakija šmat hadoŭ apiakujucca Kurapatami, vyvieźli abłomki «łavy Klintana» z terytoryi narodnaha memaryjała, piša radyjo «Svaboda».

Pavialičyć

«Vyvieźli dla dalejšaj restaŭracyi — heta mahčyma. Paśla adnaŭleńnia łava budzie ŭstalavanaja na byłym miescy, dla jaje zachoŭvańnia buduć pryniatyja zachady biaśpieki. A vandałaŭ my papiaredžvajem, što našaje ciarpieńnie skončyłasia», — paviedamiŭ kiraŭnik dyrekcyi narodnaha memaryjała Kurapaty Aleś Čacholski.​

Abaroncy viedajuć dadzienyja padazronaha naviednika

Pavodle Alesia Čacholskaha, viečaram 8 lutaha i nastupnaj nočču abaroncami Kurapat było arhanizavana dziažurstva ŭ Kurapatach. U vyniku byŭ zaŭvažany čałaviek, jaki, jak miarkujuć aktyvisty, moža być datyčnym da razbureńnia «łavy Klintana». Prykmiety hetaha čałavieka, a taksama numar aŭtamabila, na jakim jon pryjechaŭ u Kurapaty, aktyvisty pieradaduć śledčym, jakija raśśledujuć spravu ab razbureńni łavy Klintana.​

Pavialičyć

Rekordnaje pikietavańnie

Abaroncy Kurapat Aleś Čacholski, Dzianis Urbanovič i Hanna Šapućka 9 lutaha sklikali žurnalistaŭ na presavuju kanferencyju ŭ Kurapaty. Jašče adna, akramia padziej vakoł «łavy Klintana», nahoda dla razmovy z presaj — pikietavańnie restaracyi «Pojediem pojedim» ustalavała svojesablivy rekord praciahłaści akcyj pa abaronie Kurapat.

Hanna Šapućka paraŭnała ciapierašniaje pikietavańnie, jakoje pačałosia 1 červienia minułaha hodu, i pikietavańnie ŭ 2002-2003 hadach.​

«Siońnia 255-y dzień pikietavańnia. Heta ŭžo na 5 dzion bolš, čym tady, kali Kurapatam pahražała budaŭnictva kalcavoj aŭtadarohi. Mahčyma, tady ŭmovy byli bolš žorstkija, pikietoŭcy musili načavać u Kurapatach u namiocie, im pahražaŭ AMAP, ale i ciapier nam nia mienš składana. Uziać chacia b toje, što davodziłasia pikietavać u marazy pad minus 15 hradusaŭ, što za hetyja dni na nas skłali ŭžo pad sotniu pratakołaŭ, a sumy štrafaŭ na kožnaha z nas pieravalili za tysiaču rubloŭ, ale akcyja praciahvajecca».

9 lutaha restaracyju «Pojediem pojedim» pikietavali bolš za 10 aktyvistaŭ roznych apazycyjnych partyj i arhanizacyj. Pikietoŭcy damahajucca zakryćcia restaracyi, jakaja, na ich dumku, pabudavana z parušeńniem zakonu. Taksama aktyvisty ličać, što dziejnaść pobač z Kurapatami zabaŭlalnaj ustanovy supiarečyć pryniatym u biełaruskim hramadztvie normam marali.

• 0
• 0
• 0
• 0
• 0
• 0
• 0
• 0