Sud Centralnaha rajona Homiela vynies pryhavor byłomu staršyni Homielskaha rajvykankama Alaksandru Sitnicu. Jon byŭ u SIZA amal hod, piša Tut.by.
Sud pryznaŭ Sitnica vinavatym u chabary, zamachu na chabar i pieravyšeńni słužbovych paŭnamoctvaŭ i vynies jamu prysud — 10 hadoŭ kałonii ŭzmocnienaha režymu z kanfiskacyjaj. Mienavita stolki, nahadajem, prasiŭ dziaržabvinavaŭca.
Padčas sudovych razhladaŭ advakat Sitnicy i jon sam byli nie zhodnyja z tym, što prakuror, na ich dumku, budavaŭ abvinavačvańnie tolki na pakazańniach śviedkaŭ i paciarpiełych, dadzienych u chodzie papiaredniaha śledstva, i nie źviartaŭ uvahi na pakazańni, dadzienyja ŭ sudzie, — a jany istotna adroźnivajucca.
Nivodzin z paciarpiełych paźniej nie pryznaŭ siabie takim. Byłyja dyrektar AAT «Kambinat «Uschod», dyrektar KSUP «Uryckaje», a taksama namieśnik dyrektara Homielskaj ptuškafabryki ŭ sudzie zajavili, što nijakich pretenzij — ni maralnych, ni materyjalnych — da Sitnicy nie majuć i vinavatym jaho nie ličać. Dziaržabvinavaŭca ŭ svaju čarhu zapatrabavaŭ dać pravavuju acenku dziejańniam udzielnikaŭ pracesu, jakija źmianili svaje pakazańni ŭ sudzie.
Nahadajem, u siaredzinie krasavika staršynia Homielskaha rajvykankama Alaksandr Sitnica niečakana dla ŭsich źnik. Nichto z kalehaŭ i padnačalenych kiraŭnika rajona tak i nie zmoh adkazać, dzie znachodzicca čynoŭnik, a jaho telefon byŭ adklučany.
Paźniej u MUS paviedamili, što jaho znajšli i zatrymali ŭ Rasii i što jon abvinavačvajecca ŭ chabary i pieravyšeńni słužbovych paŭnamoctvaŭ. Na dumku śledstva, Sitnica łabijavaŭ intaresy pryvatnych firmaŭ, kiraŭniki jakich paśla dziakavali jamu za takoje zastupnictva.
Alaksandr Sitnica ŭznačalvaŭ Homielski rajvykankam z 2009 hoda.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary