U Rečycy piensijanierka, znachodziačysia ŭ balničnaj pałacie, atrymała surjoznyja traŭmy — na jaje ŭpała šafa. Svajaki paciarpiełaj źbirajucca źviartacca ŭ sud, piša Tut.by.
19 krasavika žychar Rečycy Uładzimir advioz 94-hadovuju maci Piełahieju Łazaraŭnu ŭ rajonnuju balnicu na płanavaje abśledavańnie. Piensijanierku źmiaścili ŭ pałatu dla vieteranaŭ Vialikaj Ajčynnaj vajny.
Praź dzień, raspaviadaje mužčyna, jon pryjechaŭ u balnicu, kab naviedać maci, a ŭ pałacie pusta.
— Ja — na post, mnie kažuć: jana ŭ traŭmatałohii. Jak tak? Čamu nam nie skazali, bo telefony ŭsio paznačany? — aburajecca mužčyna.
Akazałasia, što na piensijanierku pozna ŭviečary ŭpała šafa. Pažyłaja žančyna źbirałasia dastać rečy, a ŭ vyniku atrymała składanyja pierałomy ściahna i klučycy.
Syn paciarpiełaj kaža, što sustrakaŭsia z administracyjaj miedycynskaj ustanovy, kab vyśvietlić abstaviny zdareńnia i jak naohuł šafa mahła zvalicca.
— Mnie adkazali, što heta fors-mažor i balnica ŭ hetym nie vinavataja, šafu z pałaty prybrali.
Mužčyna napisaŭ zajavu ŭ milicyju, adpraviŭ list u Ministerstva achovy zdaroŭja, taksama źbirajecca źviartacca ŭ sud.
— Mama lahła ŭ balnicu, u jaje navat treciaj hrupy invalidnaści nie było, a ciapier jana poŭny invalid, — kaža Uładzimir.
Ciapier piensijanierka znachodzicca ŭ Homielskaj abłasnoj balnicy, jaje praapieravali.
Hałoŭny doktar Rečyckaj CRB Alaksandr Puzienka ŭ telefonnaj razmovie incydent kamientavać admoviŭsia, udakładniŭ tolki, što pa im pravodzicca ŭnutranaje rasśledavańnie, a taksama milicejskaja pravierka.
Kamientary