Sud nad dvuma bratami idzie ź listapada 2019 hoda. Raniej sudzimyja junaki (adnamu 18 hadoŭ, druhomu 20) ŭ krasaviku minułaha hoda zabili nastaŭnicu ŭ Čerykavie, paśla čaho padpalili jaje dom.
Braty pryjšli adpomścić 47-hadovaj žančynie, jakaja pracavała nastaŭnikam-defiektołaham. Nastaŭnica paviedamiła ŭ sacyjalna-piedahahičny centr pra prablemy miascovaj žycharki: maŭlaŭ, taja nie dahladaje svaich małych dziaciej. Dziaŭčyna akazałasia rodnaj siastroj «mściŭcaŭ», jakija vyrašyli pakarać nieabyjakavaha piedahoha.
Dvoje pjanych junakoŭ źbivali i katavali žančynu, nanieśli joj bolš za sotniu nažavych udaraŭ. Paśla skrali kampjutar i padpalili dom.
A ciapier prakuror paprasiŭ, kab bratoŭ prysudzili da śmiarotnaha pakarańnia.
I vielmi vierahodna, što braty atrymajuć najvyšejšuju mieru, bo ŭvahu na hetuju historyju źviarnuŭ piersanalna Alaksandr Łukašenka.
Jon davaŭ intervju hałoŭnamu redaktaru «Echa Maskvy» Alaksieju Vieniedziktavu. I kali hutarka zajšła pra admienu śmiarotnaha pakarańnia, Łukašenka ŭ jakaści prykłada złačynstva, za jakoje čałaviek zasłuhoŭvaje rasstreł, uzhadaŭ mienavita zabojstva ŭ Čerykavie:
«Dva padonki, inakš nie nazavieš, nie pamiataju, u jakim rajonie. U ich užo byli i razboi, i inšaje, i karali ich. Zabili svaju nastaŭnicu. Za što? Za toje, što jana abaraniała dvaich dziaciej ich siastry. Siastra nijakaja, asacyjalny elemient. [Nastaŭnica] baraniła i patrabavała zabrać ich ź siamji i pieradać u inšuju ci ŭ dziciačy dom. [Zabojcy] jaje rezali ŭsiu noč. Nie prosta zastrelili, zabili. Jany jaje zabivali ŭsiu noč. Jana prasiła ich, maliła. I jany ŭ rešcie rešt da ranicy dabili. Jak?»
Prysud pa spravie budzie vyniesieny ŭ najbližejšy čas.
Kamientary