U Minsku zrabili pryhožy desantny prypynak. Ale niešta pajšło nie tak FOTA
U apošnija dni minułaha hoda ŭ Minsku źjaviŭsia aŭtobusny prypynak «vulica Mazurava», aformleny ŭ honar desantnikaŭ. Ale pilnyja naziralniki ŭžo znajšli histaryčnuju niestykoŭku faktaŭ i vierahodny płahijat, piša Radyjo Svaboda
Vykanańniem i azdableńniem prypynačnaha punktu zajmajecca pradpryjemstva «Remaŭtadar» Frunzienskaha rajona Minska. Tam patłumačyli, što ŭ pierśpiektyvie na susiednim poli miarkujecca abstalavać park śpiecyjalnaj ratavalnaj i vajskovaj technikaj, u tym liku avijacyjnaj — adpaviednaja placoŭka ŭžo padrychtavanaja. A tamu, kažuć u «Remaŭtadary», tematyčny elemient budzie akurat da miesca.
Paviljon trymajecca na metaličnych karkasach i nakryty błakitnym prazrystym arhaničnym škłom. Naviersie — fihura vajskova-transpartnaha samalotu Ił-76 z čyrvonymi zorkami na kryłach i chvaście.
Unutry kanstrukcyi prymacavali tabličku z cytataj hienerała armii, adnaho z rodapačynalnikaŭ pavietrana-desantnych vojskaŭ u SSSR Vasila Marhiełava. Adnak fon nadpisu zusim nie adpaviadaje ni biełaruskaj, ni navat savieckaj realnaści.
Pilnyja karystalniki sieciva zaŭvažyli, što aŭtary prypynka-pomnika nie pahrebavali płahijatam. Vyjaviłasia, što ŭ jakaści fonu dla malunku vykarystanyja amerykanskija viertaloty «Chjui» UH-1 Iroquois i vyjavy vajskoŭcaŭ armii ZŠA, uzbrojenych karabinami M1.
Vyjava z fonu, imavierna, była ŭpieršyniu raźmieščanaja na sajcie Freepic.com. Biełaruskija dyzajniery damalavali tolki standartnyja desantnyja parašuty. Aryhinał raźmieščany pad ułasnaj licenzijaj sajtu, što dazvalaje volnaje vykarystańnie i madyfikacyju vyjavy dla asabistych i kamiercyjnych metaŭ, ale z abaviazkovym paznačeńniem aŭtarstva. Na płakacie z prypynku nie vidać paznaki aŭtarstva.
9 studzienia la paviljona źjavilisia budaŭniki ź leskami-stramiankaj. Jany raskazali, što buduć «udaskanalvać» samalot, kab toj byŭ, «jak na karcinkach» — treba damalavać iluminatary dy koleram adcianić elemienty fiuzielažu.
Taksama skazali, što na niejki čas zdymuć płakat z cytataj hienierała Marhiełava. Praŭda, nie tamu, što vizualny šerah nie adpaviadaje histaryčnaj praŭdzie, a tamu što «zalapany».
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam11
Kamientary