Biełaruskija fieministki dali hrant hrodzienskamu repieru, jaki trolić fieministak. A ciapier jašče i naminavali na premiju
Premijaj «Zrabili!» štohod uznaharodžvajuć najlepšyja inicyjatyvy pa raźvićci supolnaści. Jak praviła, heta ŁHBT-prajekty, ekałahičnyja i bodzipazityŭnyja ruchi. Na apošniaj premii adznačyli aŭtara «fieminisckaha repu» Maksima Skavińskaha. Praŭda, akazałasia, što rep toj zusim nie pra fieminizm — jon chutčej padobny da trolinhu.
Voś, naprykład, trek «Ja bomba». Śpiavaje dziaŭčyna. Pryviadziem tolki niekalki radkoŭ: «nazyvajcie mianie instamamkaj», «moj rep — kropka G, ty nie zmoh jaje znajści», «zanadta dzierskaja dla ciołki».
Ci inšy trek — «Mańjak». Pra toje, jak dziaŭčyna na abcasach, u kałhotach u sietačku, «adzietaja byccam prastytutka» idzie praź ciomny lesapark.
Nu i, ułasna, sama vokładka rep-alboma.
Maksim Skaviński — pradziusar prajekta (jon nazyvajecca Bomba). Chłopiec rodam z Hrodna, ale ciapier pracuje ŭ Polščy kraŭcom. Muzyka — jaho chobi. Maksim raskazaŭ «Našaj Ninie», jak prydumaŭ prajekt.
«My z chłopcami abmiarkoŭvali sučasny žanočy rep — Alyona Alyona, Niki Minaž… Pačali razhaniać hetu temu i vyrašyli zapisać štości bolš žorstkaje. Pahłybciesia ŭ tematyku i zrazumiejecie, što heta adkaz na sučasnaje mastactva, jakoje ciapier jość.
Častkova heta ściob, bo praz humar možna danosić idei. Fieministki ž nie asnoŭnaja metavaja aŭdytoryja hetaha repu. Jon raźličany na pacanoŭ, jakija pra heta navat nie čuli», — kaža chłopiec.
Prakamientavaŭ jon i zaŭvahi da vokładki alboma.
«Čamu fieministki ŭhaniajuć ludziej u ramki i kažuć, što možna rabić, a što nie? Fieminizm — heta prava vybaru. Kali dziaŭčyna choča pakazać svajo cieła, to heta jaje sprava», — adkazaŭ Maksim.
Cikava, što na zapis hetaha alboma jon atrymaŭ hrant pamieram $500 na konkursie dla aktyvistaŭ Idea Generation Camp.
«Usie čeki ja pradastaviŭ arhanizataram, — kaža Maksim. — $400 pajšło na zapis čatyroch trekaŭ. $100 — na zdymki klipa, pryčym asnoŭnaja častka — na ježu dla hrupy, nas udzielničała 20 čałaviek».
Premiju «Zrabili!» arhanizuje Ofis jeŭrapiejskaj ekśpiertyzy i kamunikacyi.
«My škadujem, što skłałasia takaja situacyja, i prynosim svaje vybačeńni. Naminanty premii byli sfarmiravanyja pa rekamiendacyi partnioraŭ i pieramožcaŭ minułych hadoŭ», — kaža dyrektarka Ofisa Śviatłana Zinkievič.
Jana tłumačyć, što sioleta siertyfikaty ŭdziełu jany ŭručyli ŭsim inicyjatyvam, jakija byli naminavany. A statuetki — tolki trom prajektam. Fieminisckaha repa siarod ich nie było.
«Nam varta było bolš uvažliva pastavicca da kantentu ŭsich prapanavanych naminantaŭ. My budziem pracavać nad kryteryjami naminacyi i acenki», — zapeŭnili arhanizatary premii.
Kamientary