Karupcyjanier Žylin, jaki źjechaŭ u Rasiju, atrymaŭ ad viadomaha spartsmiena $340 tysiač za «biaspłatny» katedž u Drazdach
Były staršynia kancerna «Biełnaftachim» Ihar Žylin — adzin z sotni pradstaŭnikoŭ łukašenkaŭskaj namienkłatury, jakija atrymali biaspłatna ci za biascenak nadzieł u Drazdach. Adpaviednaje rašeńnie Minharvykankam pryniaŭ u krasaviku 2012 hoda.
Jaho historyja admietnaja jak minimum dvuma abstavinami.
Pa-pieršaje, Žylin naradziŭsia i zrabiŭ karjeru ŭ Rasii, byŭ navat deputatam Viarchoŭnaha Savieta ŭ hetaj krainie ŭ pačatku 1990-ych. Ale ŭ 2009-m hodzie jaho paklikali kiravać «Hrodna Azotam», a paśla dali biełaruskaje hramadzianstva.
Pa-druhoje, u 2014 hodzie na Žylina zaviali kryminalnuju spravu za złoŭžyvańnie ŭładaj. Jon pasprabavaŭ adrazu ž uciačy, a kali nie atrymałasia, to paličyŭ za lepšaje pryznać vinu, kampiensavać škodu i ŭsio ž rušyć dadomu ŭ Rasiju.
A što katedž u Drazdach na vulicy Vierbnaj? Budoŭla pradkazalna spyniłasia ŭ dzień adjezdu haspadara. Jašče ŭ 2017 hodzie Žylin vystaviŭ dom na prodaž za $350 tysiač. Dziaržava mieła zakonnuju mahčymaść kanfiskavać niedabud, ale čamuści nie skarystałasia joj.
Jak stała viadoma «Našaj Nivie», u śniežni 2019 hoda niedabud usio ž zajmieŭ novaha ŭłaśnika. Im staŭ chakieist minskaha «Dynama» Andrej Kaścicyn. U svoj čas jon pahulaŭ za akijanam, i kantrakt u NCHŁ pieravyšaŭ $3 miljony na hod.
Kaścicyn amal nie handlavaŭsia. Pavodle infarmacyi z bazy rejestra cen, dom u Drazdach byŭ nabyty za $340 tysiač u ekvivalencie.
Susiedzi chakieista — dyrektar «Biełavija» Anatol Husaraŭ i były vice-śpikier Savieta Respubliki Maryjana Ščotkina.
Kamientary