Situacyja ŭ Biełarusi budzie abmiarkoŭvacca siońnia na kanfierencyi ŭ Brusieli.
Kanfierencyja «Darožnaja karta dla Biełarusi» projdzie 31 sakavika ŭ Brusieli pa inicyjatyvie troch frakcyj Jeŭraparłamienta.
Siarod tem zajaŭlenych dakładaŭ — pieramieny ŭ Biełarusi z kastryčnika 2008 hoda i pierśpiektyvy raźvićcia adnosinaŭ ES ź Biełaruśsiu.
U kanfierencyi voźmuć udzieł kiraŭniki frakcyj‑arhanizataraŭ, u tym liku kiraŭnik frakcyi Jeŭrapiejskaj narodnaj partyi Džozef Doł, sacyjał‑demakratyčnaj — Marcin Šulc i libieralnaj — Hrechiem Uotsan, staršynia Jeŭraparłamienta Hans‑Hiert Pieterynh i kiraŭnik delehacyi Jeŭraparłamienta pa suviaziach ź Biełaruśsiu Jacek Pratasievič.
«Darožnaja karta» — heta schiema pastupovaha raźvićcia adnosinaŭ ES ź Biełaruśsiu.Vosieńniu 2008 hoda ES z 12 rekamiendacyj Biełarusi vydzieliŭ piać pryjarytetnych: adsutnaść u krainie palitźniavolenych; demakratyzacyja vybarčaha zakanadaŭstva; zabieśpiačeńnie roŭnych umoŭ raboty ŚMI; stvareńnie ŭmoŭ dla narmalnaj dziejnaści palityčnych partyj i NDA; vyklučeńnie z Kryminalnaha kodeksa artykułaŭ, jakija tyčacca kryminalnaha pieraśledu za hramadskuju i palityčnuju dziejnaść.
Pa pytańniach kryminalnaha zakanadaŭstva na siońniašniaj kanfierencyi vystupić ekśpiert pa Biełarusi pravaabarončaj arhanizacyi «Mižnarodnaja amnistyja» Chiezer Makhił.
Ab novym zakonie, jaki rehuluje dziejnaść ŚMI, raskažuć staršynia Biełaruskaj asacyjacyi žurnalistaŭ Žanna Litvina i dyrektar jeŭrapiejskaha adździaleńnia Mižnarodnaj fiederacyi žurnalistaŭ Mark Hrubier.
Ab biełaruskim vybarčym zakanadaŭstvie ŭdzielnikaŭ kanfierencyi prainfarmuje kiraŭnik Biuro pa demakratyčnych instytutach i pravach čałavieka ABSIE Janez Lanarčyč.
Z dakładami ab pravach nacmienšaściej i svabodzie relihii ŭ Biełarusi vystupiać lider nie pryznanaha biełaruskimi ŭładami Sajuza palakaŭ na Biełarusi Anželika Borys i pradstaŭnik arhanizacyi chryścijanskich jurystaŭ Alliance Defense Fund Rodžer Kiška.
Ab umovach palityčnaj dziejnaści raskaža staršynia Ab`iadnanaj hramadzianskaj partyi Anatol Labiedźka, ab vykanańni svabody asacyjacyi — lider ruchu «Za Svabodu» Alaksandr Milinkievič.
Zajaŭlena taksama vystupleńnie Paŭła Pancyliuša, člena rabočaj hrupy pa Biełarusi Parłamienckaj asamblei ABSIE, jaki naviedaŭ Minsk 9—12 sakavika.
Udzielnikami kanfierencyi buduć pradstaŭniki Jeŭrakamisii i Savieta ES. Udzieł pradstaŭnika aficyjnaha Minska jašče napiaredadni viečaram nie byŭ paćvierdžany.
Vyniki siońniašniaj kanfierencyi mohuć paŭpłyvać na źmiest rezalucyi pa situacyi ŭ Biełarusi, jakuju Jeŭraparłamient, pavodle nieaficyjnaj infarmacyi, płanuje pryniać u pačatku krasavika.
Na 6—8 krasavika taksama zapłanavany vizit u Minsk delehacyi jeŭraparłamientaryjaŭ.Adnak, jak paviedamili BiełaPAN u Jeŭraparłamiencie, pakul nieviadoma, ci adbudziecca pajezdka — jaje arhanizatary jašče nie atrymali paćviardžeńnia ad prymajučaha boku.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary