Kolki kaštuje vypić i zakusić u Biełarusi i susiedziaŭ

U savieckija časy butelka harełki kaštavała 3 rubli 62 kapiejki. Hetaja niaźmiennaja «mahičnaja» ličba nadoŭha zastałasia ŭ pamiaci ludziej.

Ale hałoŭnaje nie heta.

Pry savietach za kiłahram śvininy treba było addać pryblizna stolki ž, kolki za plašku. Vybar miž tym, vypić ź siabrami ci prynieści dadomu miasa, byŭ roŭnym. A što ciapier?

«Naša Niva» paraŭnała ceny ŭ Biełarusi z tymi, jakija jość u susiednich krainach. U centry našaj uvahi apynulisia butelka harełki, pačak jakasnych cyharet (Marlboro), kiłahram śvininy (vyrazki) dy chvilina razmovy pa mabilnym. Treba ŭličvać, što padliki ŭ niejkaj stupieni ŭmoŭnyja. Ceny ŭ zvyčajnaj kramie i daskaŭntnery roźniacca na paradak. Roźniacca i taryfy.

Dla paraŭnańnia (u biełaruskich rublach)

Minsk: harełka (za 0,5 ł) — 6 700, cyharety — 3 200, śvinina (1 kh) — 23 000, mabilny (chvilina) — 45;

Varšava: harełka — 15 500, cyharety — 7 530, śvinina — 13 000, mabilny — 300;

Kijeŭ: harełka — 6 500, cyharety — 2 650, śvinina — 21 000, mabilny — 35;

Maskva: harełka — 7 500, cyharety — 3 700, śvinina — 18 000, mabilny — 207;

Vilnia: harełka — 16 500, cyharety — 6 600, śvinina — 20 500, mabilny — 197.

Adrazu ž kidajecca ŭ vočy, što Minsk i Kijeŭ šmat u čym padobnyja. I tam, i tam vielmi tannyja harełka i cyharety. I ŭ toj ža čas samaje darahoje miasa. Kiłahram śvininy daražejšy za try butelki harełki! Razmovy pa mabilnym telefonie ŭnutry sietki ŭ Biełarusi vielmi tannyja. Heta ledź nie adzinaje, čym my možam hanarycca.

Cyharety va Ukrainie niadaŭna padaražali, raniej jany kaštavali jašče tańniej i časta nielehalna ekspartavalisia ŭ susiednija krainy — tuju ž Polšču.

Krainy Jeŭrasajuzu — z pryviedzienaha śpisu heta Litva i Polšča — ustalavali takija vysokija ceny na tytuń i ałkahol, što heta musić dziejničać lepš za ŭsiu antyałkaholnuju sacyjalnuju rekłamu ŭ Biełarusi. U Varšavie miasa tańniejšaje za butelku harełki. Vypivać prosta niavyhadna! Jak, zrešty, i kuryć — ceny kusajucca. Polšča paćviardžaje zvańnie «miasnoj» dziaržavy. Tut samaja tannaja śvinina z usich pryviedzienych u śpisie krain.

Rasija znachodzicca dzieści miž dvuch bakoŭ. Jana vielmi dalokaja ad savieckaha praviła «harełka = miasa», ale praporcyi nie takija vialikija, jak u nas i ŭkraincaŭ. Pa cenach mabilnaja suviaź u rasijan na jeŭrapiejskim uzroŭni.

Žyćcio hetym dniom vyhadnaje dla dziaržavy, bo abarot tannaha ałkaholu atrymlivajecca prosta ahromnistym. Za studzień i luty 2009 hodu ŭ krainie byli pradadzienyja 1,379 miljona litraŭ ałkaholu ŭ pieraliku na čysty ałkahol. Bojaź vyklikać niezadavolenaść spažyŭcoŭ ałkaholu i źmienšyć prybytki biudžetu pakul pieravažvaje razumieńnie nieabchodnaści azdaraŭlać nacyju.

Jahor Marcinovič

• 0
• 0
• 0
• 0
• 0
• 0
• 0
• 0