U Breście praciŭniki akumulatarnaha zavoda demanstratyŭna syšli z sustrečy z čynoŭnikami
Bieraściejskaja milicyja 19 lipienia čarhovy raz nie dazvoliła praciŭnikam budaŭnictva akumulatarnaha zavoda sabracca na płoščy Lenina ŭ centry horada, piša radyjo «Svaboda».
Kala 12 hadzin praciŭniki zavoda pačali prychodzić na płošču na tradycyjnuju sustreču. Jany źbiralisia tam kožnuju niadzielu z 25 lutaha 2018 hodu. Adnak užo piatuju niadzielu zapar milicyja nie dazvoliła aktyvistam sabracca. Pad pahrozaj zatrymańnia ich zmušali sychodzić z płoščy, prapanoŭvajučy prajści ŭ Bieraściejski harvykankam, paviedamiŭ pravaabaronca Raman Kiślak.
Na sustreču ź ludźmi ŭ Bieraściejski harvykankam pryjšli adzin z novych ułaśnikaŭ akumulatarnaha zavoda Dźmitry Baskaŭ, a taksama hałoŭny inžyner AAT «NPF «Ekalohija» Dźmitry Hurykaŭ. Hetaja firma pravodziła karekciroŭku prajektnaj dakumentacyi zavoda, kali toj jašče naležaŭ TAA «AjPaŭer». Maderataram sustrečy byŭ staršynia Bieraściejskaha harvykankama Alaksandar Rahačuk.
Praz 15 chvilin paśla pačatku sustrečy bolšaja častka aktyvistaŭ pakinuła zalu, skandujučy «Nie zavodu!». Heta adbyłosia paśla taho, jak adzin ź lideraŭ hramadzkaj kampanii suprać akumulatarnaha zavoda Dźmitry Biekaluk zajaviŭ, što takija sustrečy pavinny mieć jurydyčnaje značeńnie, inakš heta prosta pustyja razmovy. Jon prapanavaŭ abviaścić praviadzieńnie hramadzkich abmierkavańniaŭ novaj acenki ŭździejańnia na navakolnaje asiarodździe pradpryjemstva, Baskaŭ hetuju prapanovu nie padtrymaŭ.
Alaksandar Łukašenka 22 červienia padčas sustrečy z hramadzkaściu Bieraścia, na jakoj prysutničali i praciŭniki pradpryjemstva, paabiacaŭ pravieści referendum pra los zavoda. Jaho planujecca arhanizavać paśla prezydenckich vybaraŭ 9 žniŭnia.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk27
Kamientary