Prafiesar Smalančuk: Cichanoŭskaja mnie nahadvaje Emiliju Plater. A razmovy pra «hazpromaŭskuju intryhu» — ukid, kab raskałoć
«Čamu ja padtrymlivaju Śviatłanu Cichanoŭskuju? Pa-pieršaje, pryvablivaje ščyraść i jasnaść jaje pazicyi, klučavymi punktami jakoj źjaŭlajucca vyzvaleńnie palityčnych viaźniaŭ i praviadzieńnie novych svabodnych vybaraŭ bieź Jarmošynaj, — napisaŭ u siabie ŭ fejsbuku doktar histaryčnych navuk Alaksandr Smalančuk.
Pa-druhoje, zachaplaje mužnaść žančyny, palityčny vybar jakoj karennym čynam źmianiŭ jaje žyćcio, pryvioŭ da rasstańnia ź dziećmi i zrabiŭ niapeŭnaj paślavybarčuju budučyniu», — piša prafiesar.
«Pryhadvajecca hieraičny vobraz uradženki Viciebščyny Emilii Plater, jakaja nie tolki dałučyłasia da Listapadaŭskaha paŭstańnia 1830 h., ale navat uznačaliła atrad insurhientaŭ i atrymała zvańnie kapitana».
«Nikoli raniej u našaj krainie nie nazirałasia takoha masavaha niepryniaćcia ŭłady i nikoli nie byŭ nastolki vidavočnym dysanans słovaŭ i dziejańniaŭ prezidenta i jahonaha atačeńnia nie tolki z ahulnačałaviečymi kaštoŭnaściami i pryjarytetami suśvietnaha raźvićcia, ale navat z elemientarnymi normami kultury i vychavańnia, — adznačaje historyk. — Siońnia «łukašenkaŭski farmat» dziaržaŭnaści ŭ vialikaj častki hramadstva vyklikaje adkrytuju ahidu i abureńnie. «Pierafarmatavańnie» stałasia pieršačarhovaj zadačaj dla miljonaŭ ludziej. Simvalična, što najbolš hołasna pra hety kaniec abviaścili try biełaruskija žančyny — Śviatłana Cichanoŭskaja, Maryja Kaleśnikava i Vieranika Capkała».
Prafiesar Smalančuk adznačaje, što nie vieryć u zapuščanuju kačku pra «hazpromaŭska-cichanoŭskuju intryhu» suprać biełaruskaj dziaržaŭnaści.
«Padmurak dziaržaŭnaści najbolš razburaje palityčny kurs Łukašenki, vynikam jakoha stała vializnaja zaležnaść haspadarki ad rasiejskaj syraviny i paśpiachovy praciah rusifikacyi», — piša Smalančuk. «Novy prezident — heta novyja mahčymaści dla raźvićcia adnosinaŭ i z Zachadam, i z Uschodam. Stać prezidentam dziela likvidacyi krainy, narod jakoj ciabie abraŭ, zdajecca, takoha jašče nie viedała suśvietnaja historyja», — tłumačyć historyk.
«Tym, kamu nie chapaje ŭłasna biełaruskaj kulturnickaj składovaj u dziejańniach novaj apazicyi, prapanuju dałučycca da jaje atrada i takim čynam vypravić situacyju. Žyvie Biełaruś!» — dadaje Aleś Smalančuk.
-
Illa Andrejeŭ: Starajusia bačyć mahčymaści, jakija dała nam vymušanaja emihracyja
-
«Ja nie chaču ŭ zahončyk biełaruščyny». Knyrovič adkazaŭ na krytyku za ŭdzieł u kancercie na Dzień Rasii
-
Fiaduta pra Aŭtuchoviča: U dvoryku «Amierykanki» jon uparta rabiŭ praktykavańni, imknučysia padtrymlivać siabie ŭ formie
Kamientary