30 čałaviek dapamahali kardyjołahu Alaksandru Mročaku raźbirać spalenaje lecišča. Siarod ich akademik i prafiesar

U niadzielu, 15 listapada, kala tryccaci čałaviek dapamahali akademiku Alaksandru Mročaku raźbirać zharełaje lecišča Siarod tych, chto nie zastaŭsia abyjakavym da situacyi, ludzi z suśvietnym imiem — akademik Juryj Astroŭski i prafiesar Uładzimir Minčenia, piša Tut.by.

Pavialičyć

Na vychodnych stała viadoma, što padpalili lecišča Alaksandra Mročaka. Zhareli častka doma, sklep, łaźnia i altanka. Na vulicy padpalščyki pakinuli lalku z akryvaŭlenymi vačyma, pryšpilenuju da kresła skalpielem, i cydułku z pahrozami. SK zavioŭ kryminalnuju spravu pa č. 2 art. 218 KK — pa fakcie naŭmysnaha źniščeńnia albo paškodžańni majomaści, učynienym ahulnaniebiaśpiečnym sposabam.

Dača akademika znachodzicca ŭ vioscy Uzborje kala Raŭbičaŭ. U niadzielu siudy źjechalisia nieabyjakavyja ludzi, kab dapamahčy Alaksandru Hienadzieviču spravicca z nastupstvami pažaru.

— Kab niešta adramantavać, treba prybrać «reštki pažaru». Ich dastatkova šmat, — apisvaje situacyju Alaksandr Mročak. - Pastupiła prapanova z boku našaha centra (RNPC «Kardyjałohija») pryjechać i dapamahčy. Byli akademik Juryj Astroŭski, niekalki kardyjachirurhaŭ, chłopcy z adździaleńnia reanimacyi razam z zahadčykam Andrejem Valenciukievičam, dyrektar i supracoŭniki «Palitechniki» — heta pradpryjemstva, ź jakim my supracoŭničali pa vyrabie miedycynskich vyrabaŭ. Pryjechaŭ ź instrumientami prafiesar Uładzimir Minčenia, a taksama ludzi, jakich ja nie viedaju. Usiaho kala tryccaci čałaviek.

Pamočniki pracavali pałovu dnia. Za hety čas, kaža akademik, razabralisia ź śmiećciem i vyvieźli «akryjałuju» paśla pažaru techniku. Darečy, dla zachoŭvańnia techniki susiedzi pa dačnym učastku vydzielili miedyku pusty domik.

Kab padtrymać viadomaha doktara, Alena Chomič, jakaja raniej vykładała ŭ miedycynskim kaledžy, kinuła klič dla dobraachvotnikaŭ u Facebook. Padklučycca moža luby achvotny, pieršyja ź ich užo znajšlisia.

Učora, raspavioŭ Alaksandr Mročak, u viosku Uzborje pryjazdžali «śpiecyjalnyja budaŭniki z dronam», jakija adnaŭlajuć damy paśla pažaraŭ. Jany vyznačali chod dalejšych dziejańniaŭ.

— Ciapier treba terminova raźbirać dach i mansardu — dzielicca ich zaklučeńniem Alena Chomič. — Kali budzie narmalnaja zima ci jašče pratrymajecca vosień, treba zajmacca adnaŭleńniem. Kali pačniecca «hniłaja zima», jak vykazalisia śpiecyjalisty, značyć, varta terminova razabrać dach z mansardaj i rabić časovaje pierakryćcie. Heta dapamoža vyratavać pieršy pavierch, inakš belki namoknuć i prahnijuć.

Pa słovach Aleny, usie, u kaho jość čas i siły padtrymać Alaksandra Hienadzieviča, mohuć pisać joj u Facebook.

— Ja za hetyja dni vymataŭsia. Siońnia było stolki dumak, što ja noč nie spaŭ, — raspaviadaje Alaksandr Mročak. — [U toj ža čas] takaja salidarnaść [z boku kaleh i zvyčajnych ludziej] dla mianie niečakanaść. Uzrušaje, kali jość takaja padtrymka.

• 0
• 0
• 0
• 0
• 0
• 0
• 0
• 0