Niejki čas tamu navukoŭcy zaŭvažyli dziŭnyja vypadki kavidnych pnieŭmanij. U pacyjentaŭ ź ciažkaj formaj chvaroby čamuści nie było adznak zapaleńnia ŭ dychalnych šlachach, pry tym što zvyčajna virus kavidu jakraz pranikaje ŭ lohkija praz dychalnuju sistemu. Zaraz daśledčyki vypracavali hipotezu, jakaja moža patłumačyć takija simptomy i, mahčyma, navat dapamahčy źnizić ryzyku ciažkich form chvaroby.
Kamanda navukoŭcaŭ, čyja praca była apublikavanaja ŭ vydańni Journal of Oral Medicine and Dental Research, śćviardžajuć, što virus kavidu, mahčyma, zdolny pranikać u arhanizm u abychod dychalnych šlachoŭ. Na ich dumku, krynicaj chvaroby ŭ takim vypadku robiacca dziasny, u asablivaści paškodžanyja praz paradantyt i inšyja chvaroby, piša Daily Mail.
Sprava ŭ tym, što chvaroby dziasien robiać ich bolš čullivymi da bakteryj i tym bolš da virusaŭ, jakija našmat mienšyja za bakteryi. Tamu mikraarhanizmy traplajuć ź dziasien u kryvianosnuju sistemu.
Prafiesar univiersiteta Birminhiema Ien Čepł, adzin z asnoŭnych aŭtaraŭ pracy, pryznaje, što patrebny novyja daśledavańni, kab paćvierdzić hipotezu. Kali atrymajecca heta zrabić, budzie zrazumieła, čamu, zhodna ź inšymi pracami, ludzi, jakija drenna sočać za hihijenaj zuboŭ i majuć chvaroby dziasien, u asnoŭnym majuć bolš ciažkija formy kavidu, čym ludzi sa zdarovymi dziasnami.
Ale ŭžo zaraz možna dapuścić, što vykanańnie pravił hihijeny ratavoj połaści moža źnizić ryzyku ciažkaj formy kavidu. Naprykład, u hetym moža dapamahčy čystka zuboŭ dva razy na dzień jak minimum na praciahu dźviuch chvilin i vykarystańnie srodku dla pałaskańnia rota.
Kamientary